بلوچ یکجہتی کمیٹی نا راہشون ڈاکٹر ماہ رنگ بلوچ تینا درشان ئٹی پارینے کہ بنوں ٹی دہشتگردی نا برخلاف پیشتموکا ریلی آ ریاستی جُلہو پشتون آتا زوراکی نا چرجوئی اے، ہرا ہِنوکا بھازا سال آتان برجا اے۔ عجیبو ریاست ئسے، مخلوق امن خواہنگ کن ڈن آ پیشتمک تو ریاست اوفتہ لس وڑئٹ خَلیک۔
ڈاکٹر ماہ رنگ بلوچ پارے کہ بلوچستان نا ہم ہندا حالت اے۔ بلوچ تون مروکا ظلم و تادی تا برخلاف بلوچ یکجہتی کمیٹی ‘بلوچ راجی مُچی’ ئے اڈ تننگ ئٹی اے، ولے ریاست دا راجی مُچی ئے توننگ کن تینا غُٹ زور ئے خلّنگ ئٹی اے۔
اونا پاننگ اس کہ دا بلوچستان و پختونخوا نا حالت اے، ہراڑے ہزاراتا کچ ئٹ مخلوق ریاستی ظلم و زوراکی تا برخلاف برانز کننگ ئٹی اے۔ ریاست بلوچ و پشتون آتا زوراکی ئے ایسر کننگ نا جہہ آ امن ئٹ مروکا مُچی تا جلہو کننگ ئٹی اے، ولے پِن ئنا میڈیا، صحافی و سیاست دانک چُپ کرینُہ۔ اوفتہ ہم ریاست آن بار بلوچستان و پختونخوا نا بیرہ مال ءُ مڈّیک نظر بریرہ، ایلو نیمہ آ مروکا ظلم و زوراکی آ تینا خن تِہ تر کرینُہ۔
گُڈی ٹی او پارے کہ ای بلوچ و پشتون راج آن خواست کیوہ کہ تین پہ تین نا کوپہ مریر و اواری نا جہد ئٹ تینا وطن آن دا زوراکی تِہ چُھٹّفر۔
