بیگواہ مروکا ڈاکٹر دین محمد بلوچ نا مسڑ و وائس فار بلوچ مسنگ پرسنز نا سیکرٹری سمی دین بلوچ تینا ویڈیو کلہو ئسیٹی پارینے کہ اینو نن کُل ئے خبر ءِ کہ بلوچ آ تا تیوہ زند متاثر ءِ، بلوچ آ تا اینو و پھگہ امن کُل تباہ کننگانو بلوچ آتا راجی شناخت و بقاء کُل متاثر ءُ۔
سمی دین پارے کہ اینو جہان تیزی ئٹ ترقی نا کسر آ ہِننگ ءِ ولے بلوچ نیست ءِ، بلوچ آک ہر وڑ نا مسئلہ آ تیان متاثر ءُ ہرا جہان آ او زند گدریفنگ ءُ اینو ہمونگا رکھوک افس۔
او پارے کہ بلوچ آ تے اوفتا آبائی ہند آ تیان زوراکی ئٹ کشنگ ءُ، اینو ہزار آ بندغ آک پاکستان نا زندان تیٹ قیذ ءُ و اذیت سگھنگ ءُ، اوفتا خاہوت آک امر زند گدریفنگ ءُ او نن کُل ئنا موناٹے، اینو بلوچ آ تا سُم خلوک جون آک ویران آ تیٹ تموک ءُ، اِرغ نا ویل مرے یا روزگار نا کُل بلوچ آ تیکن مسئلہ جوڑ کننگانو۔
او پارے کہ اینو ننا تیوہ زند جنگ زدہ جوڑ کننگانے، ولے نن جنگ نہ امن خواہنا ننے خوشحال آ زند اکن اوار مروئی ءِ۔
او پارے کہ بلوچ یکجہتی کمیٹی 28 جون آ گْوادر ئٹی اَسہ راجی مچی ئس کننگ ءِ، دا راجی مچی ئے سرسوب کننگ نن کُل ئنا ذمہ واری ءِ نن کُل اوار مرین و جہان ئے نشان تین کہ ہرا تاغت بلوچ آن زندہ مننگ نا حق ئے پُھلانے اینو بلوچ ہمونا برخلاف بش مسُنے و بلوچ دا فیصلہ کرینے کہ او نا ظلم ئے منوف۔ ای لس آن خواست کیوہ کہ دا راجی مچی ٹی بشخ ہلِسہ اودے سرسوب کیر۔
