بلوچ یکجہتی کمیٹی نا راہشون ڈاکٹر ماہ رنگ بلوچ تینا درشان ئٹی بیست ءُ ہشت جولائی آ گْوادر ٹی مروکا ‘بلوچ راجی مُچی’ ٹی بلوچ راج آن بشخ ہلّنگ نا خواست کرسہ پارینے کہ او قبائلی، طبقاتی، علاقائی، مذہبی لسانی، پارٹی بازی و سیاسی گروہی مفاد آتان یکہ مرسہ بیرہ بلوچ نا پِن آ بشخ ہلیر۔
اونا پاننگ کہ بلوچ راج، بلوچ چاگڑد و بلوچ وطن آ غُٹ کوزہ گیری فکر و سازش ئٹ جوڑ کروکا پِن ئنا قبائلی، طبقاتی، علاقائی، مذہبی، لسانی، جنسی، سرحدی، پارٹی بازی، گروہی مفاد و بشخ منّنگ آن بُڑز مرسہ بیرہ بلوچ کن بیست ءُ ہشت جولائی آ گوادر ٹی تینے سرکیرے و بلوچیت نا ثبوت ئے تنّنگ ہر بلوچ نا راجی فرض اے۔
او پارے کہ اگہ بلوچ و بلوچ وطن ئے بچّفوئی اے تو بلوچ تون سما کننگ، بش منّنگ و پِڑ آ بنّنگ آن ویتہ پین ہچّو کسر اف۔ نن تون اوار مننگ و اسہ زندہ ءُ راج ئسے نا دروشم ئٹ مُچا دنیا ئے دا پاننگ نا وخت اے کہ بلوچ داسا تینا وطن آ مُستی تینے آ زوراوری ئے منّوف۔
ڈاکٹر ماہ رنگ بلوچ پارے کہ بلوچ راجی مُچی غُٹ بشخ مننگ و مُری تہ پد بٹسہ اسہ راج ئسے نا دروشم ئٹ اوار مننگ نا تاریخی آ وخت اے۔ دا موقع ئے ضائع کننگ نا نسخان بلوچ راج ئے مرو و داڑان راجی حوالہ ئٹ فائدہ ہفّنگ راجی بقا اے۔
