بنوں ٹی پاکستانی لشکر ہشت کارندہ نا مرگ ئنا گواچی مننگ ئے پک کرے۔
یاتی مرے کہ داڑان مُست پاکستانی میڈیا بنوں جلہو نا بارث ئٹ خبر آک تالان اسر کہ لشکر جلہو ئے بےسوب کرینے۔
تدوکا دے تا دا خبر مونا بس کہ پاکستان نا صوبہ خیبر پختونخوا نا ہند بنوں ٹی آرمی کیمپ آ سہب ئنا 4 بجہ غا 40 منٹ آ سلاہ بند بندغ آک شورو آن پُر اسہ لاری سے دیوال و سپلائی ڈپو نا نیام ئٹی روڈ آ تراک آن کینٹ ئٹی پیہانو۔
داسہ پاکستانی لشکر نا انٹرسروسز پبلک ریلیشن ( آئی ایس پی آر ) نا جارکش پارے کہ سیکیورٹی فورسز درو بنون چھاؤنی ٹی سلاہ بند بدغ آتا جلہو ئے بےسوب کرینون و جلہو ئٹی ہشت کارندہ خلننگ مسونے۔ اندون جوابی کاروائی ٹی کُل 10 حملہ آور خلننگ مسونے۔
آئی ایس پی آر نا رِد ئٹ جلہو ئٹی خلننگ مروکا کارندہ آک نائب صوبیدار محمد شہزاد، حوالدار ظل حسین، سپائی ارسلان اسلم، ایف سی نا لانس نائیک سبز علی، سپائی امتیاز خان، حوالدار شہزاد احمد، سپائی اشفاق حسین خان، سپائی سبحان مجید اوار ءُ۔
جارکش پاکستانی لشکر پک کرےکہ دا جلہو ئے حافظ گُل بہادر گروپ تینائی کرینے۔ حافظ بہادر گروپ اوغانستان ئٹی کاریم کننگ ءِ۔ دا گروپ مُست پاکستان ئٹی دہشتگردی نا کاروائی کن اوغان سرزمین ئے کارمُز کننگ ءِ۔
