بلوچستان نا بنجائی شار شال ئٹی بیگواہ آ بلوچ آتا زالبول و نرینہ تا زی آ زوراکی نا برخلاف، گوادر ،پنجگور و پسنی ٹی حق دو تحریک نا نیمہ غان برانز کننگا ۔
پنجگور ئٹی برانز نا وخت آ تقریر نا وخت آ حاجی موسی پنی ءُ بندغ ئس است ئنا دورہ نا سوب آن بیران مس۔
حق دو تحریک نا نیمہ غان شال ئٹی بلوچ یکجہتی کمیٹی و بیگواہ آ بندغ آتا پولیس گردی، سُمکاری، شیلنگ، نا برخلاف گوادر ئٹی برانزی ریلی ئس کشنگا۔
برانزی ریلی ٹی نرینہ و زالبول آتا بھلو کچ ئس بشخ ہلک۔
ریلی نا بناء جاوید کمپلیکس آن مس ہرا سید ظہور شاہ ہاشمی ایونیو آن مرِسہ شہدائے جیونی چوک آ ایسر مس۔
برانزی ریلی ٹی تقریر کرِسہ حق دو تحریک نا بنجائی چیئرمین حسین واڈیلپ، بنجائی جنرل سیکرٹری حفیظ کھیازئی پارے کہ شال ئٹی پرامن برانزی ریلی آ ریاستی جلہو، زالبول آتےا شیلنگ و لٹ کٹ کننگ، ننگ و ناموس لغت کاری ئے ترند ئنگا لوز آتیٹ شیف خلینہ۔ ہرافتے کہ ریاست دزگیر کریس ئس او کُل بےڈوہ اُسر اوفتے عدالت ئٹ ہتنگ مروسس، ریاست نا خنک بلوچ نا دریا، زمین و اوفتا مال و وسائل آ خلوک ءُ۔
او پارے کہ ڈاکٹر مہرنگ بلوچ نا ہچو ردی ئس افک اوڑا ایف آئی آر کننگانے۔ ملک ئنا راہبند ئے ریاستی ادارہ غاک تینٹ پرغنگ ءُ اوفتا زی آ ایف آئی آر مرے۔
او پاریر کہ گوادر ہچ کس ئنا باوہ نا میراث افک، بلکہ ماہ رنگ، سمی، بیبو نا ءِ۔ ماہ رنگ،سمی، بیبو بلوچستان نا فخر ءُ۔
