کمال بلوچ باوہ نا پِن محمد نصیب گچک جوری نا رہینگوکو سے، ہرادے پاکستانی فوج پانزدہ اگست دو ہزار بیست ءُ دو آ اونا خلق آن پین بھازا بندغاتون اوار بیگواہ کریسس۔ پدا ایلو غُٹ ئے یلہ کننگا ولے کمال بلوچ ئے مسہ پین بیگواہ عبدالقیوم زہری، ناصر فاروق و غلام جان تون اوار خلکسُہ و اوفتا لاش آتہ شال ئنا اسپتال آ ہتنگاسس، ولے اوفتہ بےدرست مننگ نا سوَب مستونگ ئٹی نادرست آ بندغاتا قبرستان ٹی دفن کننگاسس۔
پدا سی ٹی ڈی خضدار و آواران نا ضلعی انتظامیہ ئے اوفتا خلّنگ (شہیدی) نا بابت ئٹ خط نوشتہ کریسس کہ ناصر فاروق جاگہ صادق آباد زہری، غلام جان جاگہ بائی پاس شال، کمال خان باوہ نا پن باہوٹ جاگہ جلی آواران خلّنگانُہ۔ سی ٹی ڈی تینا خط ئٹی خلّنگوکا شہیداتہ دہشت گرد پاریسس۔
او مُستی پاریسس کہ دافتہ نادرست سرپند مرسہ ویتہ وارث آن دفن کننگانے۔
بیست ءُ سئے جون اِرا ہزار بیست ءُ سئے آ بیگواہ مروک عبدالقیوم و ناصر فاروق ئے اوفتا مخلوق درست کرے ولے کمال خان درست متویسس۔
خاہوت نا کُنڈان دہ جولائی اِرا ہزار بیست ءُ چھار آ اسہ درشان ئس شنگ کننگا ہراٹی اونا یلئی نا خواست کننگا۔ دا درشان آن پد پٹ ءُ پول کننگا و بیگواہ کمال نا خلّنگ پھاش مس۔ ہراتم سی ٹی ڈی نا خط و کمال نا شناختی کارڈ نشان تننگار تو کمال نا خلّنگ ئے اونا خاہوت منّا۔
