بلوچ یکجہتی کمیٹی نا راہشون ڈاکٹر ماہرنگ بلوچ پارے کہ حکومت تون ہیت تران سرسوب مننگ کتو، نن پرامن برانز ئٹی تولوک اُن و ننا برانز برجاء مرو پھگہ شام ئنا اِیلو لائحہ عمل نا پڑو تننگو۔
ڈاکٹر ماہرنگ بلوچ پارے کہ بلوچ یکجہتی کمیٹی نا اِرا جاگہ تیا برانز چلنگ ءِ۔ ننا حکومت وقت ئتون ہیت تران بے سوب مسُنے۔ جی پی او چوک و ہاکی چوک آ برانز برجاء ءِ۔ ننا برانز ئے نزور کننگ کن جتاء بندغ آک غصہ ٹی ہرا ہشُنگ و پلویڑ ٹی اوار ءُ او ننے آن افس۔ ننے آ مُسہ ایف آئی آر نوشت ءُ، نن ولدا ہم پرامن وڑ ئٹ تینا برانز ءِ برجاء تخون۔
اونا پاننگ اس کہ اگہ حکومت مذاکرات کننگ خواہک نن تیار اُن۔ محرم نا تُو ءِ نیٹورک ہم بند مرو ولے نن پدی مروفن۔ ہراوخت اِسکان ننا خواست آتے مَنتنو برانز برجاء مرو۔
پولیس وین ئے ہشوکا تا حوالہ ئٹ برانزی تا پاننگ اس کہ پرتشدد حالیت آتے خراب کننگ نا سازش ءِ، مطالبات آ تا حصول اِسکان پرامن برانز نا کسر ئے اَرفیسہ برانز کننگ اُن، مشتعل بندغ آ تیان ننا ہچ تعلق اف۔
دا حوالہ ئٹ برانز ئٹی اوار بیبو بلوچ پارے کہ بلوچ یکجہتی کمیٹی پرامن برانز آ یخین تخک نہ نن سرکای املاک ئسے نسخان تسونن و نہ کس ئسے تکلیف تسونن، ننا پرامن برانز ہموخت اسکان برجاء مرو ہراوخت اسکان ظہیر بلوچ نا آجوئی عمل ئٹی ہتنگ مف، مَنہ سازشی عناصر دا تُدینی تیان برانز ءِ سبوثاز کننگ نا بے سُہب کوشست کننگ ءُ۔
داکان مست ہم برانز ئٹی اوار چار بندغ آ تے ہلکُر و برانز آن کشار ہراکہ سازش کن راہی کننگاسُر۔
