شال بلوچ اسٹوڈنٹس آرگنائزیشن آزاد نا جارکش تینا درشان ئٹی پارینے کہ بلوچستان ئٹی کوزہ گیر فوج کیہی سال آن زور ئٹ بیگواہ کننگ نا چم آن کاریم ہلسہ مخلوق ئے بندی کننگ ئٹی ءِ ہراتم پاکستان نا دا زوراکی تا برخلاف خاہوت آک امن ئٹ برانز کشیرہ تو ریاست اوفتون بےدادی کرسہ بلوچ راج ئنا حوالہ ئٹ تینا سوچ ئے پھاش کیک۔
جارکش پارے کہ کوزہ گیر دا وخت آ زور ئٹ بلوچستان آ تینا کوزہ ئے برجا تخنگ خواہیک۔ ولے دنیا نا تاریخ پائک کہ اسہ زوراک ئس ہم زور ئٹ اسہ راج ئس شیف کننگ کتّنے ریاستی زوراکی نا برخلاف بلوچ راج ئنا سیاسی چائنداری ریاست نا بےسوبی ءِ و بلوچ نا راجی آجوئی نا فکر آ ایمان نا پھاشی ءِ۔
او پارے کہ کوزہ گیر پاکستانی ریاست ہنوکا کیئی دے آن برانز آ تُولوک بیگواہ ظہیر احمد نا خاہوت آ جُلہو کرسہ تینا گندہ آ مون ئے نشان تس۔ اسہ کُنڈان پاکستان بلوچستان ئے کوزہ کرسہ لُٹ ءُ پُل کننگ ئٹی اے تو ایلو نیمہ آ بےگناہ بندغاتہ بیگواہ کیک و بندی کیک۔ ظہیر احمد ئے ہنوکا تُو ئٹی شال آن بیگواہ کننگا ہرانا برخلاف اونا خاہوت و ایلو مخلوق سریاب روڈ آ دھرنا تس، و ہنوکا یانزدہ دے آن ظہیر نا غیرقانودی وڑئٹ بیگواہی نا برخلاف دھرنا آ تُوسسُہ۔ او ریاست نا چُپی نا برخلاف ریڈ زون نا نیمہ آ ہِننگ ئٹی اسّہ ہراڑے ریاستی کارندہ آک اسہ وار سریاب و ایلو وار ریڈ زون آ جُلہو کریر ہراٹی اسہ نیاڑی سے تون اوار شش بندغ سُم کاری ٹی ٹِک کننگار، و کیئی نیاڑی تہ ہلکُہ پولیس تھانہ ٹی بند کریر، بھازاک ٹھپی کنّنگار۔ بلوچ نیاڑی تا دا وڑ نا زوراکی ئٹ کوزہ گیر ریاست بلوچستان ٹی تینا کوزہ نا درشانی ئے کیک۔
جارکش گُڈی ٹی پارے کہ نن بندغی حق آتا ادارہ آتان و بلوچ راج آن خواست کینہ کہ او کوزہ گیر نا دا چم آتا گواچی مننگ نا جہہ آ اونا برخلاف جہد کیر۔ انتئے کہ ننے خبر مروئی ءِ کہ ایتم اِسکان بلوچستان آ پاکستان نا کوزہ ارے پاکستان نا زوراکیک برجا مرور۔ بلوچ راج ئے کوزہ گیر نا زوراکی تا برخلاف ہر وڑئٹ جہد کروئی ءِ۔ اے وخت اِسکان بلوچ راج کوزہ گیر نا زوراکی تا برخلاف اواری ئٹ گھام ہفتو و چُپ مس تو کوزہ گیر تینا زوراکی تہ مُستی کرسہ کرو۔
