نوشتہ کار:میرک بلوچ
مَٹ : بچکند بلوچ
گوریلا ہمو مریک ارا ناممکن ئے ہم ممکن جوڑ کے، ارا خراب آن خراب حالیت ئٹی ہم دو بڑز کپ و گُڈی ساہ اسکان جنگ کننگ و سر سہب نا کوشست کیک، ہزار آ بندغ آ تیٹی اَسٹ ئس گوریلا جوڑ مریک و گوریلا ہمو مریک ارا جسمانی و ذہنی رد ئٹ مضبوط مرے، ہر کس آن خُلیپ۔ گوریلا تینا توفک نا بیرا اِرا سُم آن دشمن ئے بے سہب کننگ کیک۔
ساجد نا قصہ ہم ہندنءِ، ساجد بیرا سِی سُم تیان دشمن تون مُسہ گھنٹہ اسکان جنگ کننگ آن پد گڈیکو سُم نا فلسفہ آ عمل کریسہ شہادت ئے قبول کرے۔
دسمبر نا یخ آ شام اسک و یخ ئنا زور ہم۔ شام ئنا یانزدہ بج مننگ اسکہ ساجد تینا کمرہ ٹی تولوک شہید ڈاکٹر منان آ اَسہ آرٹیکل ئس نوشت کننگ اسک۔ اَسہ دُو آن موبائل ئٹ آرٹیکل نوشت کننگ اسک اِیلو دو ٹی سگریٹ ئے توریسس، راستیکو نیمہ آ ایم سولہ پوسکن انگا اسکوپ تون اوار تخوک اسک اراٹی بیرا اَسہ میگزین ئس اسک سِی سُم والا۔ اچانک موبائل آ فون بس ساجد بشخندہ کریسہ کال ئے ہرفے۔
ہان سہیل اَرانگ رہینگاس نی اَراوخت آن نا ودار کننگ اُٹ ( سہیل ساجد نا سنگت اسک و تومکا اَسہ تنظیم ئٹی شاری گوریلا جُہدکار اسُر و اینو نا شام تومکاک مشن آ ہِننگ نا پلان کریسُر) اِیلو نیمہ آ سہیل خلیسہ پارے
نی اُرا ٹی اُس؟
ساجد : اڑے اُرا ٹی مروفٹ گُڑا ارانگ مروٹ ای نے پاریسُٹ نا کنا اُراغہ بریس و نی انتکے داخس خلینگ اُس انت ہیت ئسے۔
سہیل : یار نا اُرا نا ایب کھیب ئٹ بھاز مُچی ءِ و کنے لگیک دشمن مرو۔
ساجد : دا نی انت پاننگ اُس، اَسہ منٹ ئس سَلہ ای چیک کیوہ( ساجد کمرہ نا لئیٹ ئے بند کرے و کھڑکی ئے ملیسہ پیشن نا نیمہ آ ہُرا پیشن وردی بینوک مَنہ سلاہ بند بندغ آک پوزیشن ہلنگ اسُر) ساجد کھڑکی ئے بند کریسہ سہیل تون پارے سہیل دا راستی ئٹ دشمن ءِ نی ولدا ہِن۔
سہیل : نی گنوک مسونس انت داخس بھاز دشمن ءُ،نی یکہ امر جنگ کننگ کروس ای بننگ اُٹ۔
ساجد : سہیل دانگا دشمن نا کچ سد آ تیٹی ءِ نی ہِن ای سنبھالوٹ تہ۔
سہیل : نی راستینا گنوک مسُنوس و نیتو بیرا اَسہ میگزین ئسے پین نہ سُم ارے نا پین گِڑاس نا کُل سامانک کنتون ءُ ای بننگ اُٹ۔
ساجد : سہیل بطور کمانڈر کنا کمانڈ ءِ کہ نی ہِن و سنگت آ تے سلام پاس و پاس تہ کہ کنا جہد ہنداڑسکان اسک و نُم جُہدئے مونی دیرے کنا قبر آ بیرک الم خلیرے۔
دا پاریسہ ساجد تینا موبائل ئے بند کرے و خُڑک آ تخوک ایم سولہ ئے ہرفے و در ئسیان نشانہ ہلک، چانڑدہ ای آ تُوبے اسک ہنداخاطران دیوال آن خُڑک ئنا دشمنک پاش اسُر، دشمن 40 میٹر نا مُری آ اسُر، ساجد کاٹم آ تا نشانہ ہلک و فائر کرے۔ سُم سیدھا نشانہ آ لگہ و اَسہ دشمن ئس کھسک۔ دشمن تینا مون سُمکاری کرے انتئے کہ اوفتے ہچ خبر تمتو کہ سُم اَراکان فائر مسُنے دشمن ڈھکوک اسک، سُمکاری کریکہ ساجد ہندا سوچ کننگ اسک کہ امر سِی سُم ان اَسہ مُرغنو جنگ ئس کیو؟
ساجد ولدا پانزدہ منٹ آن پد اَسہ سُم ئس فائر کرے ارا نشانہ آن مَچہ اینگ لگہ و دشمب نا سُمکاری برجاء اسکہ، ہر دہ، پانزدہ منٹ آ اَسہ سُم ئس فائر کننگ آن پد ساجد ہم 18 سُم فائر کریسس و چار دشمن کارندہ آک خلنگاسُر، داسا دشمن ساجد نا لوکیشن ئے پٹاسس دشمن بھلا سلاہ تیان سُمکاری کننگ اسک، اِرا گھنٹہ گدرینگاسُر داسا ساجد کن جنگ کننگ بھاز مشکل اسک ولے پدا ہم ساجد اَسہ گھنٹہ اسکان دشمن ئے تورے۔
آخرکار مُسہ گھنٹہ آن پد شام یک بجہ آ ساجد نا سِی انگا سُمک چھٹار۔ ساجد تینا جیب آن ہمو اِرا سُم تے کشہ ( ساجد ایلو سرمچار آتا وڑ گڈیکو سُم ئنا فلسفہ آ عمل کننگ نا خواہش تخاکہ ہنداخاطران اِرا سُم مُدام جتاء تینا جیب ئٹی تخاکہ) میگزین ئٹی شاغیسہ توفک ئے آٹو موڈ آ تخیسہ چیمبر کرے و توفک نا بیرل ئے تینا کھاڈی نا شیف تخیسہ خَن تے بند کرے بشخندہ کریسہ پارے ” اے کنا گلزمین ای بننگ اُٹ کنے تینا سینہ ٹی جاگہ تیس ای بھاز خوش قسمت ئسے اُٹ کہ کنے گلزمین کن شہادت نصیب مننگءِ او ہم گڈیکو سُم ئنا فلسفہ آ، زندگ بات بلوچستان آزاد بات بلوچستان“دا پاریسہ ٹریگرئے خلک و اِرا سُم تینا کاٹم آن ہیپار کرے، مدامی کن زمین نا شہید آتا قطار ئٹی تینا پِن ئے تاریخ نا پن تیٹی نوشتہ کریفے، ہندنن بیرا سِی سُم آن مُسہ گھنٹہ نا جنگ ایسر مس دشمب سُہب اسکان سُمکاری کریسہ کرے و ارا وخت سُہب مس دا ہُریسہ ہبکہ مسُر کہ اَسہ بندغ ئس داخس وخت اسکان ننے توریسس ننے لگاکہ کہ بھاز بندغ مرور۔
