پشتون تحفظ موومنٹ نا سروک و انقلابی شاعر گیلامن وزیر زند و مرگ نا جنگ ئے کرِسہ اِستو اسلام آباد نا پمز اسپتال ئٹی علاج نا وخت آ شہید مس۔
گیلامن وزیر آ پاکستان نا بنجائی شار اسلام آباد ئٹی منہ دے مالو جلہو مسس۔
گیلامن وزیر 3 دے ئسکان زند و مرگ ئنا ہلّ و تور ئٹی ئس اونا خاہوت اودے دران ڈیھ آ ڈیھ تے آ علاج کن دننگ خواہِس ولے حکومت پاکستان اونا پن ئے ای سی ایل آن کشیتوو ہندا سوب آن اودے دران ڈیھ دننگ متوو و او کزیت کرے۔
او ہنوک منہ دے آن پمز اسپتال ئٹی اسک۔ اسپتال نا ڈنا پی ٹی ایم نا باسک آتا بھلو کچ ئس ساڑی اسک۔
اِستو شام ئنا پستون تحفظ موومنٹ نا سروک منظور پشتین اسپتال نا ڈنا ساڑی آ باسک آتے گیلامن نا کزیت نا خبر ئے تِس ہراڑان دڑد غم ئس بش مس۔
او ہندا وخت آ پارے کہ گیلامن سلیتوو ولے اونا دتر نا نن وام دار اُن نن انصاف کن ہر حد ئسکان کانہ۔
پی ٹی ایم نا ردئٹ گیلامن نا نمازِ جنازہ جمعہ نا دے ئنا 4 بجہ آ ادا کننگ مروئے و شار ئٹی شہید ئے دروت ندر کننگو۔
گیلامن وزیر تینا پشتو شاعری ٹی پائک کہ کنا مرگ آ دنیا ہوغو۔
