عراق نا عدالت جہانی دہشت گرد آ تنظیم نا مہالو نا بھلا ابوبکر بغدادی نا زائیفہ امِ حزیفہ کن دہشت گرد لشکر تون کاریم کننگ و نیاڑی تِہ تینا اُرا ٹی بند کننگ نا بنیات آ موت ئنا سزا گچین کرے۔
ہراڑے پاننگا کہ یزیدی فرقہ نا نیاڑی تہ داعش نا کارندہ آک سنجار نا ضلع آن بیگواہ کریسُہ پدا موصل ٹی ابوبکر بغدادی نا زائیفہ او نیاڑی تہ تینا اُرا ٹی بندی کریسس۔ اودے عراقی سیکیورٹی ادارہ آک ہلکُنہ۔
اسہ عدالتی زمہ وار ئس پِن ئے تینا ڈھکیسہ نوشتہ کار آتہ پارے کہ عدالت امِ حزیفہ ئے بندغی حق آتا برخلافی، یزیدی تہ خلّنگ و دہشت گردی نا کاریم تیٹ کمک نا بنیات آ پاہو تننگ نا سزا ئے بنفینے۔ او پارے کہ گُڈیکو فیصلہ عراقی اپیل کورٹ نا عمل آن گدرینگسہ مرو۔
ابوبکر بغدادی عراق و شام ئنا بھلو بشخ ئسیٹ اِرا ہزار چھانڑدہ آن ہودہ اِسکان جنگ ترسہ تینے غُٹ مسلمان تا خلیفہ پاریسس ولے پدا اِرا ہزار نوزدہ ٹی امریکی فوجی تا جُلہو ٹی او خلّنگا۔
اِرا ہزار نوزدہ ٹی امریکی فوج ئنا جُلہو ٹی بغدادی تینا بارودی جیکٹ ئے ترخفیسس ہراٹی اود و اِرا چُھنا تَہ کھسکُسہ۔ ہندن اِرا زائیفہ ئے تَہ امریکی فوجیک سُم کاری ٹی خلکَسہ۔
او وخت امِ حزیفہ اوڑے ساڑی متویسس اودے پدا اِرا ہزار ہژدہ ٹی ترکی آن ہلکسہ، و فروری ٹی اودے عراق آ راہی کننگانے۔
اقوام متحدہ نا کارندہ آتا پٹ ءُ پول نا رِدئٹ اوفتو ثبوت ارے کہ داعش یزیدی تہ خلکُنے و اوفتہ تینا مذہب ئے بدل کننگ یا موت ئے گچین کننگ نا پارینے۔ پٹ ءُ پول کروکا دا ہم پارینُہ کہ دا یام ئٹ ہزارا یزیدیک خلّنگانُہ، ہزاراک بیگواہ کننگانُہ و چُھنا نیاڑی تون ظلم و تادی کننگانے، ہرافتیٹ زور ئٹ زنا و ایلو بےدادیک اوار ءُ۔
