شال بلوچستان ئٹی زور ئٹ بیگواہ آ بندغاتا بیگواہی نا برخلاف برانزی کیمپ ئے پنچ ہزار پنچ سد ءُ شش دے مس۔
بی ایس او نا چیئرمین جیئند بلوچ، ذاکر بلوچ، خیر محمد بلوچ و ایلوفک کیمپ آ بسّہ خاہوت آتون اواری نا درشانی کریر۔
وی بی ایم پی نا وائس چیئرمین ماما قدیر بلوچ پارے کہ پاکستانی فوج ئنا لشکرکشی بےگناہ آ زورئٹ بیگواہ بندغاتہ شہید کننگ اے۔ پاکستان بندغی حق آتا قانود آتہ پرغک، و کوزہ گیر ریاست بلوچ ئے چھٹّفنگ خواہیک۔ ہرا فوجی لشکرکشی تہ ٹارگٹ آپریشن پائک، او بلوچ ئے خلّنگ نا منصوبہ آ کاریم ءُ۔
ماما قدیر پارے کہ جہان ئٹ اسہ ہم قانودی ءُ ڈیہہ ئسیٹ فوجی لشکرکشی ٹی لس مخلوق آ جھاز ئٹ جُلہو کننگپک۔ ولے لس بلوچ نا زیہا گولہ خلّنگ آن پھاش مریک کہ بلوچستان و پاکستان نا سْیالی بیرہ کوزہ کروک و کوزہ مروک نا اے، و کوزہ گیر ئے بیرہ کوزہ مروکا ڈغار بکار اے نہ کہ اونا مخلوق۔
ماما قدیر بلوچ پارے کہ دنیا نا تاریخ دا وڑ نا ظالم تہ وختس بادشاہ، وختس جنرل و وختس راج آتا دروشم ئٹ خنانے۔ ولے دا وخت آ سامراجی ریاست آک غُٹ ئنا ظلم آتان ود ظلم کننگ ئٹی ءُ ہرافتہ ایسکا دنیا ارے یات کننگو۔ انتئے کہ دا ریاست آک مظلوم آتا تینا زوراکی ئٹ ہنداخہ ٹھپ تخانُہ کہ ہرافتا سوَب بندغی نا پیڑی مدام شکّی رہینگو۔
