پاکستانی فوج ئنا دُو آن بیگواہ مروک ظہیر بلوچ نا یلئی کن اونا خاہوت درو یک شنبے آ شال ئٹی سیشن کورٹ سریاب آن برانزی ریلی ئس کشا و بلوچستان یونیورسٹی نا مون آ دھرنا تننگا۔
ریلی ٹی بیگواہ تا خاہوت آک، خوانندہ گَل، سیاسی تنظیم و ایلو مخلوق بھلو کچ ئسیٹ بشخ ہلکُہ۔ ہرافتا دُو تیٹ بیگواہ تا عکس و کارڈ اسک اوفتا بیگواہ بندغاتا آجوئی و زور ئٹ بیگواہی تہ بند کننگ نا حوالہ ئٹ نوشتہ اس۔
ریلی ٹی وائس فار بلوچ مسنگ پرسنز نا چیئرمین نصراللہ بلوچ، ظہیر احمد نا ایڑ و ایلو بیگواہ تا خاہوت آک تران کرسہ پاریر کہ ظہیر احمد ئے بیست ءُ ہفت جون آ شال آن زور ئٹ بیگواہ کننگا اونا خاہوت ہنوکا شش دے آن سیشن کورٹ نا مون آ دھرنا تننگ ئٹی اے، ولے افسوس اے کہ بلوچستان حکومت نا کُنڈان کس ئس اوفتون حوال کتّنے۔
او ریاست آن خواست کریر کہ ظہیر احمد نا خاہوت نا توار ئے بننگ مرے و ظہیر ئے سلامت یلہ کننگہ۔
مُستی تران کرسہ پاریر کہ بیگواہ بندغاتا خاہوت آک تینا بندغاتیک بھاز دڑد کُننگ ئٹی ءُ۔ دا ریاست نا آئینی و اخلاقی زمہ واری اے کہ او بیگواہ تا خاہوت آتہ خوار کننگ نا جہہ آ قانودی وڑئٹ انصاف تے و مُچ زند ئنا دڑد آن آجو کے۔
