بلوچ اسٹوڈنٹس آرگنائزیشن نا کُنڈان گْوادر، شونداری نا ہیتاک و راستی نا سرہال آ گوادر پریس کلب ئٹی دیوان ئس اڈ تننگا۔ ہرانا بھلائی ئے بی ایس او نا چیئرمین بالاچ قادر کرے و بھلا مہمان بی این پی نا بنجاہی جوائینٹ سیکریٹری نزیر بلوچ اس۔
دیوان نا اولیکو بشخ ئٹی گوادر ئے واڑ خلّنگ و جہی آ مخلوق نا مسئلہ آتا ہیت کننگا۔ ہراڑے تران کروکا سابق ایم پی اے گوادر حمل کلمتی، بی این پی ضلع گوادر نا صدر ماجد سہرابی و بی ایس او نا مُستنا بنجاہی دیوان نا باسک کریم شمبے اسّہ، ہندن بی ایس او نا بنجاہی دیوان نا باسک کرم خان دیوان ٹی بروکاتا میزبان اس۔
دیوان نا ارٹمیکو بشخ ئٹی چیئرمین بی ایس او بالاچ قادر، بی این پی نا جوائنٹ سیکریٹری نزیر بلوچ، بی ایس او نا مہالو نا چیئرمین ایڈوکیٹ سعید فیض، بی این پی نا پولکار و پبلی کیشن سیکریٹری ڈاکٹر قدوس بلوچ، گوادر نا سیاسی راہشون عابد رحیم سہرابی تران کریر۔
تران کروکا پاریر کہ بلوچ تینا راجی اختیار ئے الّنگ کن ہِچ وڑ تیار مروف، بلوچستان نا مال و مڈی تا زیہا ریاستی کاریمک کوزہ مروکو ڈیہہ ئسے نا وڑئٹ ءُ۔ دا ریاست ئٹی زوراک ہفتاد سال آن لٹھ ئنا زور آ لُٹ ءُ پُل کننگ ئٹی اے۔
او پاریر کہ گوادر ٹی ترقی و شون ئنا ہیتاک راستی آن برخلاف ءُ، دا پِن ئنا ترقی بلوچ نا لُٹ ءُ پُل اے، دا وڑ نا ترقی ئے نن ہِچ وڑ منّوفن ہراٹی بلوچ آ پین ظلم و تادی مرے۔ کیئی سال آن ترقی نا پِن آ داڑے نا مخلوق ئے کشنگ نا کوشش مننگ ئٹی اے، گوادر شار ئے واڑ کرسہ اودے سیکورٹی زون ئسیٹ بدل کننگ ئٹی ءُ، ہراڑے جہی آ مخلوق ئے پیہنگ ہم الّوفس۔
دیوان ئٹی تران کروکا پاریر کہ ہراتم گوادر پورٹ ئنا بِنا کننگا ہمو وخت آ بلوچ راج دوست آتہ شک اس کہ بلوچ ساحل آ کوزہ کننگو، ترقی نا پِن آ مخلوق ئے باوہ پیرہ ئی آ ڈغار تان کشّنگو۔ اینو او غُٹ شک آک اسٹ اسٹ آ راست پیشتنگ ئٹی ءُ۔ اینو ہم ننے شک اے کہ بروکا وخت ئٹی گوادر ئے بلوچستان آن جتا کرسہ اسہ پِن ئس تننگہ۔ دا غُٹ مسئلہ آتہ و گوادر ئے بچّفنگ کن مُچ بلوچ تنظیم، خوانندہ گَل آتہ اواری ئٹ جہد کروئی تمّو۔
