پاکستانی فوج ئنا دُو آن آواران آن زور ئٹ بیگواہ مروک ورنا دلجان باوہ نا پِن اللہ بخش نا خاہوت وائس ‘فار بلوچ مسنگ پرسنز’ نا چیئرمین ماما قدیر تون شال پریس کلب ئٹی پریس کانفرنس کرسہ پارے کہ دلجان بلوچ نا بیگواہی نا برخلاف ہشت جولائی آ دو شنبے نا دے خضدار-کراچی بھلا کسر ئے برانز کرسہ بند کرون، و مخلوق آن خواست کینہ کہ او ننا دڑد ئے تینا دڑد سرپند مرسہ دا برانزی دیوان ئٹی بشخ ہلیر تاکہ ننا بندغ سلامت آجو مرے۔
او پاریر کہ بلوچستان کھسفنگ جاہ ئس جوڑ مسّنے ہراڑے بندغ سہدار آن ہم شیفو زند ئس گدرینگ آ مجبور اے۔ ہڑدے زور ئٹ بیگواہیک، خسّوکا لاش آک مخلوق کن ڈکھ ئس جوڑ مسّنُہ۔ افسوس دادے کہ زندغا بندغ آتا بیگواہی و خلّنگ آ بندغی حق آتا توار ئے خَلوکاک چُپ توسنُہ۔
او پاریر کہ انت بلوچستان ٹی رہینگوکا بندغ افس؟ انت دنیا نا بندغی آتا قانوداک بلوچستان ٹی چلّنگ کپسہ؟ انت بندغی حق آتا تنظیم و حکومت آتیٹ داخس وس اف کہ او زندغا بندغ آتہ کھسفوکا بندغ ٹی بدل مننگ آن تورِر؟ انت بلوچستان نا مخلوق مُچ زند ہندا دڑد ئٹ رہینگو؟
