بلوچستان نا ہند شال ئٹی زوراکی ئٹ بیگواہ مروکا ظہیر احمد نا خاہوت نا نیمہ آن سریاب کسر اِرٹمیکو دے ہم برانز کریسہ بند کننگا، خاہوت شام ئے کسر آ گدریفے۔
برانزیک تہ پاننگءِ کہ اینو چار شمبے 03 جولائی 2024 بیگاہ نا وخت چار آ نیم بجہ آ سریاب سیشن کورٹ آن ہلیس ہزار گنجی اسکان ظہیر احمد نا آجوئی کن اَسہ ریلی ئس کشنفنگو۔
نن بلوچ راج آن خواست کینہ کہ ننا توار جوڑ مریر و دا ریلی ٹی اوار مریسہ ظہیر احمد نا آجوئی کن توار بُڑز کیر۔
نُمے خبر مرے کہ ظہیر بلوچ ئے 27 جون 2024 آ سریاب کسر برما ہوٹل آن خُڑک بدنام زمانہ کاؤنٹر ٹیررزم ڈیپارٹمنٹ نا کارندہ آک دے ئنا دو بجہ نا ٹائم آ ہرفیر دریر ہراکان پد او بیگواہءِ۔
خاہوت نا پاننگءِ کہ زوراکی ئٹ بیگواہی آن مُست کیہی وار ریاستی کارندہ آک سول یونیفارم ئٹی تینا آفس آ ہم توار کریسُر۔ و گُڈی وار اَراوخت اُرا آ چھاپہ مس گڑا اودے تڑی تسُر کہ نے بیگواہ کرون، پدا ہندن مس، اودے ہرفیر دیر۔ ہراکان پد ننا ایف آئی آر ہم نوشت کننگتو۔
او پاریر کہ نن دا وخت خواست کینہ کہ ظہیر احمد ئے سی ٹی ڈی بیگواہ کرینے، سی ٹی ڈی نا برخلاف ایف آئی آر نوشت کننگ مرے و اِرٹمیکو خواست دادے کہ اودے عدالت ئٹی ہتیر۔
اَراوختسکان ظہیر احمد ئے عدالت ٹی ہتنگ متنے اسکان ننا برانز برجاء مرو داڑتون اوار ننا برانز آ تیٹی پین سختی بریسہ کرو۔
