ڈپٹی کمشنر آفس کیچ ئنا مون آ برجاء انگا بیگواہ بندغ آ تا خاہوت آک دہ دے ئنا وخت تریسہ برانز ئے توریر۔
بیگواہ بندغ آ تا خاہوت آ تا نیمہ آن ہنوکا شانزدہ دے آن ضلعی انتظامیہ کیچ ئنا مون آن برجاء انگا برانز اینو انتظامیہ تون اوار سرسُہب مزاکرات آن پد دہ دے اکن توننگا۔
برانز ئٹی خاہوت تون اوار پریس کانفرنس آن ہیت کریسہ صبغت اللہ عبدالحق پارے کہ اینو بیگواہ آ بندغ آتا خاہوت و ضلعی انتظامیہ ڈپٹی کمشنر اسماعیل ابراہیم،اے ڈی سی و ڈی او ایلون تون مزاکرات مس ڈپٹی کمشنر خاہوت آ تون نِوشت کروک معاہدہ کرے و اَسہ جی آئی ٹی ئس جوڑ کرے اَراٹی کُل سرکاری ادارہ آک حساس ادارہ آ تون اوار مرور و دہ دے ئٹی برانزی آ جاگہ ٹی اوار ہشت بیگواہ مروکا تہ خاہوت ئے جوانو ورندی تننگ مرو۔
ہندا معاہدہ نا رد اینو آن دہ دے اکن خاہوت آک برانزئے ایسر کرے، خاہوت آک تُربَت ئٹی ساڑی مرور، نن اُمیت کینہ کہ انتظامیہ معاہدہ نا احترام کریسہ بیگواہ مروکا بندغ آتے دا دہ دے ئٹی جوان رزلٹ تننگ مرو و مطمئن کننگءُ۔
او مُستی پاریر کہ پھگہ آن سرکاری جی آئی ٹی کاریم نا بناءئے کرو و پھگہ اجلاس مرو، دا جی آئی ٹی ئٹی خاہوت آ تا نیمہ آن بلوچ یکجہتی کمیٹی نا راہشون و پنی آ شخصیت صبغت اللہ عبدالحق، سول سوسائٹی کنوینئر گلزار دوست، بیگواہ مروکا مسلم عارف نا باوہ عارف غلام، بیگواہ مروکا جہانزیب نا باوہ فضل کریم، بیگواہ مروکا جان محمد نا مار میران جان محمد، بیگواہ مروکا فتح میار نا باوہ میار بلوچ، بی ایس او پجار نا یاسر بیبگر، معاذ بلوچ، ناکو کریم ہم اوار مرور۔
