بلوچ راجی زْرمبشت (بی این ایم) شہید راشد مشکے آواران ہنکین نا کُنڈان تنظیم نا بیگواہ بنجاہی راہشون ڈاکٹر دین محمد بلوچ نا زور ئٹ بیگواہی ئے پانزدہ سال پورو مننگ آ ہنکینی کماش مہران بلوچ نا بھلائی ٹی دیوان ئس اڈ تنّنگا۔ ہراٹی بھلا مہمان بنجاہی ویلفیئر سیکریٹری اقبال بلوچ و دیوان نا بندوبست کروک ہنکینی کمک کماش تلار بلوچ اس۔ دیوان ئٹی تنظیم نا باسک و ایلو مخلوق بھلو کچ ئسیٹ بشخ ہلکُہ۔
دیوان نا بھلا مہمان اقبال بلوچ تْران کرسہ پارے کہ تنظیم نا سنگت آتا و راہشون آتا دا وخت ئٹی کاریم کننگ، دیوان اڈ تننگ دا پھاش کیک کہ نن مون آ بنّنگ ئٹی اُن۔ انتئے کہ سنگتاتہ احساس اے کہ دا کاروان شہیداتا کاروان اے، سیاسی بیگواہ مروکا سنگتاتا کاروان اے و جہد ئنا سرسوبی شہیداتا دتر نا وسیلہ اے۔
او پارے کہ ڈاکٹر دین محمد بلوچ نا مرغنا بیگواہی آن دا ہیت پھاش مریک کہ اونا وطن و راج ئتو مہر اخس سوگو اے کہ او دشمن نا زندان ئٹی سزا تہ سہینگ ئٹی اے۔
اقبال بلوچ پارے کہ نوزدہ سد ءُ ہفتاد نا وخت مشکے و جھاؤ نا یام ئٹ دومگ مَش ئٹی پاکستانی فوج عطا سمالاڑی، نیٹو، بی بی سومری و پیراں ڑی تون اوار سینزدہ بلوچ ئے شہید کرے۔ او وخت آ فوج پارے کہ دا جاگہ ٹی داسا سیاسی ءُ بندغ ودی مروف، ولے ڈاکٹر دین محمد و ڈاکٹر منان جان بی این ایم نا کُلو ئے دا علاقہ آتیٹ سرکریر، شہید آتا خاہوت آتون ملّار، شہید استاد علی جان تون اوار راجی جہد ئکن کاریم کریر۔ اینو نن خننگ ئٹی اُن کہ راجی جہد ئٹی دا علاقہ آک مون آٹُہ۔
ہنکینی کماش مہران بلوچ تران ئٹی پارے کہ ڈاکٹر دین محمد بلوچ اسہ سوگو ءُ فکر ئسے نا خواجہ و وطن نا دڑد ئے ماروکو راہشون ئسے، او سیاست نا بِنا ئے خواننگ نا وخت آ بی ایس او آن کرے، او ورنا تا سیاسی ہیل کاری و چائنداری آن پد تنظیم ئٹی بلوچ راجی آجوئی کن راج ئے بش کننگ کن جہد کرے۔
او پارے کہ ڈاکٹر دین محمد بلوچ لس ءُ ڈاکٹر ئس اف بلکہ مخلوق نا درمان ئے کننگ تون اوار راجی ویل آن ہم پُہہ اے و اونا درمان ئے چائک ۔ او پارے کہ بنیاتی ناجوڑی راجی غلامی و کوزہ گیری اے۔ داڑان آجو مننگ آن ویتہ نن دنیا تو اوار ہنوکو راج ئس مننگ کپنہ۔
