کراچی پریس کلب ئٹی پریس کانفرنس کرسہ بلوچ خوانندہ آک خوانندہ بہادر بشیر نا آجوئی نا خواست کریر پاریر کہ بلوچستان ٹی زور ئٹ بیگواہیک ہڑدے ودّسہ بریرہ ہرافتا غُٹ آن زیات ورنا و خوانندہ آک گواچی مریرہ۔ بلوچستان ٹی دہنو دے کم گدرینگک کہ خوانندہ آتِہ ہفپس و ریاستی کارندہ آک اوفتہ بیگواہ کپس۔
او پاریر کہ خوانندہ آتا ہفّنگ دنّنگ برجا اے، پسنی آن کراچی یونیورسٹی ٹی فلسفہ نا خوانندہ بہادر بشیر ئے بیست ءُ سئے جون اِرا ہزار بیست ءُ چھار آ فوج زور ئٹ بیگواہ کرینے۔
بہادر بشیر ہرا عید ئنا چُھٹی آ یونیورسٹی آن اُرا آ بسّس، بیست ءُ چھار جون آ بہادر بلوچ نا خاہوت پسنی زیرو پوائنٹ آ برانز کرے و مکران کوسٹل ہائی وے ئے بند کرے، ہراڑے انتظامیہ نا پاننگ آ کہ اسہ دے آن پد بہادر آجو کننگو ولے چھار دے گدرینگ آن پد ہم بہادر بلوچ یلہ متو۔
بیست ءُ شش جون آ بہادر بلوچ نا خاہوت مکرن کوسٹل ہائی وے آ دھرنا آ توس تو اودے فوج ئنا کُنڈان خلّنگا و خْوار کننگا۔
نن کراچی یونیورسٹی نا بلوچ خوانندہ آک بہادر بلوچ نا خاہوت تون اواری نا درشانی کن بسّنُن و ننا خواست اے کہ کراچی یونیورسٹی نا خوانندہ بہادر بشیر ئے سلامتی ئٹ آجو کننگہ اگہ اودے آجو کتوس تو نن اونا خاہوت تون اوار کراچی ٹی برانز کرون۔
او پاریر کہ پاکستان نا آئین و اقوام متحدہ نا کنونشن ٹی پھاش اے کہ زور ئٹ بیگواہی آن مخلوق ئے بچّفنگ ریاست نا زمہ واری اے، ہندن پاکستان نا سپریم کورٹ آن ہلیس ہائی کورٹ اسکان فرمان اے کہ مخلوق ئے زور ئٹ بیگواہ کننگپ بلکہ اوفتا ہلّنگ کن قانودی وڑ ئٹ کاریم کننگہ، ولے بلوچستان ٹی جہانی قانود و پاکستانی آئین پرغنگرہ۔
خوانندہ آک پاریر کہ بلوچستان ٹی دہنو ہم تدینی مسّنے کہ اسہ بندغ ئے بھاز وار زور ئٹ بیگواہ کننگانے۔ بھازا ورناک سال آتان پد آجو مریرہ تو زہنی ناجوڑی تا گواچی مریرہ کارہ و دہن ہم مریک کہ بیگواہ مروکا ورناک جِندکُشی کیرہ زند ئے تینا دُو ئٹ چھٹفرہ، ہرا خاہوت آتا تیناک بیگواہ کننگرہ او ڈکھ آتا حوالہ مریرہ۔
بلوچستان ٹی جہد ئے ایسر کننگ کن ریاست زور ئٹ بیگواہی تا چم ئے چلّفنگ ئٹی اے، دا وخت آ سی ٹی ڈی آن بارنگا ادارہ آک زور ئٹ بیگواہ بلوچ آتہ خلیرہ ہرانا سوَب بیگواہ تا خاہوت آک تینا بندغاتیک بھاز پریشان ءُ۔
پریس کانفرنس ئٹی پاریر کہ خوانندہ آتہ زور ئٹ بیگواہ کننگ اوفتا بروکا وخت ئے برباد کننگ اے، بلوچستان ٹی دہنو دے کم کائک کہ بلوچ خوانندہ ئس ہفپس دپس یا نسخان تفس۔ بلوچستان یونیورسٹی آن بیگواہ سہیل و فصیح بلوچ داسکان آجو متنُہ، ہرافتہ اِرا ہزار بیست ءُ یک ئٹی بیگواہ کریر۔ اوفتیک غُٹ خوانندہ تنظیم آک برانز کرسہ بلوچستان یونیورسٹی ئے کیئی تُو اسکان بند کریر ولے او مون آ ہتنگتوس
او پاریر کہ راولپنڈی ایگریکلچر یونیورسٹی آن فیروز بلوچ ئے اِرا ہزار بیست ءُ دو ئٹی زور ئٹ بیگواہ کریر ہرا داسکان یلہ متنے۔
تربت یونیورسٹی آن نعیم رحمت ئے اِرا ہزار بیست ءُ دو ئٹی بیگواہ کریر او ہم داسکان بندی اے۔
خضدار آن انیس بلوچ ہرا بہاالدین زکریا یونیورسٹی آن گریجویٹ کرینے، اودے چھار جون آ زور ئٹ بیگواہ کننگا و داسکا آجو مننگ ئٹی اف۔
انیس بلوچ ئے سی ٹی ڈی نا دُو ٹی ترسہ ایلو بلوچ آتان با اوڑا دروغ ئٹ دوبہ خلّنگا، ہرانا سوَب انیس بلوچ نا خاہوت و ننے خُلیس اے کہ اودے ایلو بلوچ آتا وڑئٹ خَلپس۔
او داڑا افسوس کریر کہ بلوچستان ٹی بھازا خوانندہ آک زور ئٹ بیگواہ ءُ۔
