نوشتہ کار : نزہت بلوچ
جہان ئٹی اراوخت کس درامد ئس نا ڈیہہ آ قوضہ کرینے و نا راج آ زوراکی کریسہ اوفتے غلام جوڑ کننگ نا کوشست کرینے گڑا ڈیہہ ئنا باتیک غلامی نا زند آن پیشتمنگ کن بش مسُنو و زوراک ئے و قوضہ گیرئے تینا ڈیہہ آن کشانو۔
اراوخت برطانیہ بلوچ سرزمین ئے اِلا ہنا مَنہ وخت آن پد پاکستان پِنیءُ غیر فطری ریاست ئس بلوچ سرزمین آ توفک نا زور آ قوضہ کرے، اراکہ اینو اسکان برجاءءِ ،پاکستان نا قوضہ گیری نا برخلاف غلامی نا زند آن پیشتمنگ کن بلوچ راج ئنا ورناک مش تیکن مون کریر کہ دا دشمن کن طاقت ئس جوڑ مریسہ اودے تینا ڈیہہ آن کشن، دا جہد آجوئی نا جنگ ئٹی نن کیہی عظیم آ کڑدار تے گویان ارا ننا شہیدآکءُ، بلوچ راج اینو ہموفتا نظریہ ئے ہرفسہ دا جہد آجوئی نا جنگ ئے مونی دننگ ئٹیءِ، بلوچ جہد آجوئی نا جنگ ئٹی شہید مروکا میجر نورا پیرک ارا مُدام دشمن آ قہر شاغاکا و اینو بلوچ جہد آجوئی ٹی بشخ ہلوکا ورناک میجر و ایلو شہیدآتا دروشم ئٹ دشمن آ قہر شاغنگءُ۔
میجر نورا پنجگور نا ہند پروم ئٹی ودی مس، ہمو پروم ارا داسا بلوچستان نا ایلو جاگہ تہ وڑ شہیدآتا ہند پاننگک،میجر نورا مڈل اسکان پروم ئٹی خوانا،اوکان پد پنجگور خدابادان ٹی تینا خواننگ ئے مونی درے، خواننگ ئے برجاء تخیسہ میجر نورا سائنس کالج کوئٹہ ٹی داخلہ ہلک، کوئٹہ ٹی خواننگ آن پد میجر مُستی خواننگ کن پنجاب نا یونیورسٹی آ ہنا۔
میجر تینا خواننگ تون اوار بلوچ اسٹوڈنٹ آرگنائزیشن ئٹی اوار اسک ارا بلوچ اسٹوڈنٹ آتیتون اوار بلوچ راج ئے سرپدی تسکہ بلوچ راج ئے دا ظلم وستم نا برخلاف بش مَننگ کن پاریکہ، میجر نورا مَش تیا ہِننگ نا فیصلہ ئے ہموخت کرے اراوخت کہ میجرئے بیگواہ کریسہ اونا بیگواہ مروکا سنگت زاکر مجید ارا دئسکان بیگواہ ءِ اونا زوراکی ئٹ بیگواہی نا برخلاف درشان ئس تننگ نا پاریر کہ ہندا پار زاکر مجید بیگواہ متنے بلکہ او مَش تیٹیءِ و بلوچ سلاہ بند تنظیم ئٹی بشخ ہلکُنے، میجر نورا آجو مننگ آن پد خواننگ ئے الا و بلوچستان نا مَش تیا مون کرے۔
میجر تینا زند ئنا دہ سال بلوچستان نا مَش تیٹ سختی و سوری برداشت کریسہ دشمن آ قہر شاغیسہ گدریفے۔
26 اپریل 2020 نا دے دشمن تون جنگ کریسہ تینا ساہ ئے قربان کرے، بلوچ تاریخ ئٹی تینا پِن ئے نوشت کریسہ سر سُہب مس، چار نیمہ آن دشمن نا گھیرہ ٹی سُم تہ توار ئٹی نزور مننگ نا جاگہ آ میجر بلوچ راج اکن تینا گڈی کلوہ ئے تریسہ پارے
”نم کُل سنگتاک ننا شہادت آ مونجا مفبو،بلکہ کُل جُہدکار آ تے تینا مار و ایلم پوہ مبو، نن دُہنو کاریم ئس کتنُن کے نُما کاٹم شیف مرے نن مُست نُما کاٹم ئے شیف کتانُن نہ مونی شیف مننگ ایلون، نن ہندونو کاریم ئس کرینُن و کننگ ئٹی اُن کہ نُما کاٹم فخر آن بُڑز مرے و بُڑز مرو ،و دُہن مف کہ ننے آن پد نُم دا جُہد آن پیشتمیرےننے آن انت ئس مننگ کریکہ نن تینا بساط نا کچ ئٹ راجی آجوئی کن جنگ و جہد کرین داسا راجی آجوئی نا جنگ نُما کوپہ آتا تخوکءِ ، دا سوچ خلپرے کہ نن نُما نیام ئٹی افن جسمانی حساب ئٹ اگہ افن ولے نما سوچاتیٹی مُدام نُمتون اوار مرون دا جنگ ننا کُل ئنا و راجی بقا نا جنگ ءِ۔”
دا ننا شہیدآک ءُ ارا ننے ہمت، حوصلہ تیرہ، شہیداآک ارا تینا زند ئنا ہچو پرواہ ئس کتوس تینے بلوچ راج نا آجوئی کن تینا سرزمین نا خل و بوچ آتا رکھ ئے کرسا ندر کریر، اینو نن تینا شہیدآتا بابت ئٹ خواننہ کہ اوفک امر تینا خوشحال آ زند ئے الیسہ تینا وطن و راج ئنا دڑد ئے پوہ مریسہ دا کسر آ ہنار، دا کسر نا سختی تے برداشت کریر ولے ہچ نزور متوس، ایسر اسکان تینا راج ئنا تینا سرزمین نا آجوئی نا جہد ئٹی اوار اسُر۔
بلوچستان نا آجوئی آن پد بلوچستان نا مش تہ نیمہ غا ہنوکا تے مَشک دا گلزمین نا بہادر آتا قصہ تے بنیفو کہ امر نُمکن و دا سرزمین نا مَش،خل،بوچ ئے ئنا رکھیفنگ کن دا ڈیہہ ئنا باتیک تینے ندر کریر، ننا شہیدآک گواڑخ آتا دروشم ئٹ ہتم تیٹی دا سرزمین آ برور و شہیدآتا دُروشم ئٹ بروکا دا گوڑاخ آ تے خنوکاک ہبکہ مریسہ، گواڑخ آ تا زیبائی نا ندارہ تے ہُرور۔
