آواران بلوچستان نا دے کیہلینگی مَش تیٹ دراسکی و چوکو نا ایب ءَ کھیب ئٹ پاکستانی فوج ئنا لشکرکشی برجا اے۔
ایلو نیمہ آ نوشکی نا شش ورنا زیارت ٹی سیل و سواد کننگ آن پد درینگڑھ آن بیگواہ مسّنُہ۔
خاہوت نا پاننگ کہ نوشکی نا بیگواہ مروکا ورناک جمعیت علما اسلام بلوچستان نا کنوینر مولانا منظور احمد مینگل نا عزیز ءُ۔
مولانا منظور احمد مینگل نا پاننگ کہ درینگڑھ اسکان موبائل آ حوال مننگ آن پد اِرا دے مریک اوفتون حوال مننگ ئٹی اف، و شش ورنا گاڈی تون اوار خننگپسہ۔
ہندن حب بلوچستان آن اسہ ورنا ئس پاکستانی فوج زور ئٹ بیگواہ کرینے۔
حوال آتا رِدئٹ امیر آباد حب آن پاکستانی فوج و اونا ادارہ آتا کارندہ آک شہداد اسماعیل ئے زور ئٹ بیگواہ کرینُہ۔ اودے نُہہ فروری اِرا ہزار بیست ءُ چھار آ حب چوکی آن بیگواہ کننگانے، اوکا پد اونا ہچو حوال ئس ملّنگ ئٹی اف۔
نمے سما اے کہ بلوچستان نا بھازا جاگہ آتیٹ زور ئٹ بیگواہیک برجا ءُ، دا تدینی تا برخلاف بیگواہ بندغاتا خاہوت آک تربت ئٹی برانزی مظاہرہ کننگ ئٹی ءُ۔
بلوچ یکجہتی کمیٹی زور ئٹ بیگواہی، ہفّنگ خلّنگ و ایلو بندغی حق آتا برخلافی نا زیہا جولائی ٹی ‘بلوچ راجی مُچی’ نا پِن ئٹ جلسہ ئس کننگ نا پڑو کرینے۔
یات مرے خَدو نا سال بلوچ یکجہتی کمیٹی ڈاکٹر ماہ رنگ بلوچ نا بھلائی ٹی بلوچستان ٹی ریاستی ظلم و تادی تا برخلاف مارچ کریسس ہرادے ہَندی و جہانی آ تیبری آ شرف رسینگا۔
