بلوچستان نا ضلع گْوادر شہر پسنی ٹی کوسٹل ہائی وے زیروپوائنٹ نا ہند آ خوانندہ بہادر بشیر نا زوراکی ئٹ بیگواہی نا برخلاف برجاء انگا برانز ئنا برانزی تیا پنچ شمبے نا سُہب پاکستانی لشکر جلہو کرے، زالبول چُنا و ورنا تے بےدادی نا نشانہ جوڑ کریسہ کسر ئے مَلار تینا لاری تہ قافلہ ئے گدارار۔
ہموخت برانزیک مزاحمت کریر گڑا لشکر اوفتے بے دادی نا گواچی کرے، اوفتا موبائل آتے پُھلار و لاٹھی چارج کریر۔
لشکر نا بےدادی آن کیہی ورنا تیتون اوار زالبول و چُناک ٹپی مسُر۔
سوشل میڈیا ٹی شنگ مروکا کیہی ویڈیو تیٹی خننگ مریک کہ امر لشکر توفک نا زور آ برانزی تے بےدادی ئٹ مُر کیرہ۔
خاہوت نا پاننگ ءِ کہ لشکر نا بےدادی آن کیہی زالبول آک ٹپی مسُنو۔
خاہوت نا پاننگ ءِ کہ پاکستانی لشکرمریض ئسے نا بہانہ ئٹ زوراکی ئٹ کسر ئے مَلنگ نا کوشست کریر ولے اوفتون مریض الوکا، اراوخت برانزیک مریض ئے نشان تننگ نا ہیت کریر گڑا لشکر اوفتا موبائل آ تے پِھلار اوفتا بےدادی کریر۔
خاہوت نا پاننگ ءِ ارا وخت اسکان خوانندہ ئے آجو کننگ متنے برانز برجاء مرو۔
بیگواہ آ خوانندہ نا ایلم پارے چار دے مُست اونا بھلا ایلم، ارا کراچی یونیورسٹی نا خوانندہ ئسے، اودے بیگواہ کننگا، ارانا رد عمل ئٹی نن پسنی زیرو پوائنٹ ئے بلاک کریسُن، پدا پسنی انتظامیہ نا نیمہ آن سرکاری سطح آ اِرا دے خواہاسُر، ہندا سوب آن نن اِرا دے برانز ئے تورین، انتظامیہ نا نیمہ آن قول پورو وے مننگ آن دَرو آن مکُران کوسٹل ہائی وے زیرو پوائنٹ پسنی ئے بند کرین۔
او پارے کہ اراوخت اسکان بہادر بشیر ئے آجو کننگ متنے برانز کننگ اُن۔
