سوات خیبر پختونخوا ٹی اسہ ٹولی ئس قرآن نا گستاخی نا دوبہ خلسہ سیل و سواد کن بروکا ئے خلکُنے ہرادے پولیس نا پلویڑ آن کشّسہ خلکُنہ کھسفینہ۔
دا تدینی پنچ شمبے نا نن مدین پِنی آ ہند آ مسّنے ولے داسکان دا سما تمتنے کہ خلّنگوکا بندغ آ انت سوَب آن قرآن نا گستاخی نا دوبہ خلّنگانے۔
سوات نا ضلعی پولیس افسر زاہد اللہ نا پاننگ کہ مدین ئٹی مخلوق اسہ سیل و سواد کروکو سے آ قرآن نا بےشرفی نا دوبہ خلکنے، ہراتم پولیس جاگہ آ سرمس تو بازار ئٹی مخلوق سیل و سواد کروکا ئے توریسس ولے پولیس اودے اوکان کشّا تھانہ آ ہیس۔
پولیس نا پاننگ کہ دا بندغاک واہم پولیس نا پد ئٹ تھانہ ئے سرمسہ و پولیس رکھ ئکن دروازہ ئے بند کرے۔
دا یام ئٹی مسیت آتا پڑو کننگا ہراڑا بھلو کچ ئس مخلوق تھانہ نا مون آ بس مُچ مس و دوبہ لگّوکا ئے خواہا۔
پولیس نا پاننگ کہ دا لشکر اسیکہ تھانہ آ خل کاری کرے و پدا دیوال آتان جُپسہ تہہ ٹی پیہا، نسخان کرے و پولیس نا کارندہ آتے ہم مچہ ٹھپی کرے۔
خَنوکاتا پاننگ کہ لشکر ہرا وخت تھانہ ٹی پیہا تو پولیس نا کارندہ آک تھانہ ئے الّار نرّار۔
جہی او بندغ ئسے نا پاننگ کہ مُچی اسیکہ گستاخی نا دوبہ لگّوکا ئے سُم ئٹ خلک کھسفے و پدا لاش ئے تَہ ہُشا۔
