ڈاکٹر دین محمد نا زور ئٹ بیگواہی ئے پانزدہ سال پورو مننگ آ سوشل میڈیا آ ہفت دیئی مہم ئس چلّفنگ نا پڑو کننگانے۔
دا حوالہ ئٹ ‘بلوچ وائس فار جسٹس’ نا کُنڈان شنگ مروکا پریس ریلیز ئٹی پاننگانے کہ ڈاکٹر دین محمد بلوچ نا زور ئٹ بیگواہی ئے پانزدہ سال سرجم مننگ آ ایکس (ٹویٹر) آ ہفتہ آن لائن چائنداری مہم ئس چلّفنگو۔
درشان ئٹی بیگواہ بندغاتا خاہوت، صحافی، بندغی حق آتا کارندہ، سیاسی و سوشل میڈیا آ کاریم کروک آتان خواست کننگانے کہ او بیست ءُ دو جون آن بیست ءُ ہشت جون اسکان ڈاکٹر دین محمد نا زور ئٹ بیگواہی نا برخلاف تینا اِرا مِنٹ ئنا ویڈیو جوڑیر، نوشتہ کیر و ٹویٹ کیر۔ ہندن بیست ءُ ہشت جون آ مہم نا گُڈیکو دے ایکس (ٹویٹر) آ شام ئنا ہفت آن دوانزدہ اسکان مہم چلّفنگو، ہراٹی ہر پلک ئنا مخلوق ئے بشخ ہلّنگ نا پاننگانے۔
