بیگواہ مروکا بندغ آ تا خاہوت آک تُربَت ٹی برجاء انگا برانز ئے اینو شام ئنا شش بجہ ڈی سی آفس تُربَت نا مون آ دننگ نا پڑو کرینو۔
بیگواہ مروکا بندغ آتا خاہوت آتا برانز نا جاگہ آن شنگ مروکا پڑو ئٹی پارینو کہ او ہنوکا چار دے آن شہید فدا چوک آ برانز کننگ
ءُ۔ اوفتے سرکار نا نیمہ آن مطمئن کن ورندی رسینگتنے، اینو شام ئنا شش بجہ آ او برانزئے ریلی نا دروشم ئٹ ڈی سی آفس تُربَت نا مون آ درور۔
خاہوت آک کُل سیاسی، چاگڑدی تنظیم و لس مخلوق آن خواست کرینو کہ اینو شام ئنا شہید فدا چوک آ سر مرسا ریلی نا بشخ مریر۔
یاتی مرے کہ دا وخت کیچ ئنا جتاء جتا انگا ہند بلیدہ، پیدارک و تُربَت آن سیالی تخوکا بیگواہ مروکا بندغ آتا خاہوت آک تُربَت شہید فدا چوک آ تینا بندغ آتا آجوئی کن برانز کریسہ تُسنو۔
