انیس بلوچ نا باوہ عبدالرحمن و خاہوت انیس بلوچ نا دزگیری آ درشان ئس شنگ کرسہ پاریر کہ چھار جون آ انیس بلوچ ئے پب جی ہوٹل آن نادرست آ سِلاہ بند بندغاک بیگواہ کریسر۔ درو 15 جون 2024 آ سی ٹی ڈی بلوچستان تینا درشان ئٹی اسہ نادرست ءُ مقدمہ ئسیٹ فرد نمبر 60/2024 دفعہ 4Exp302-324QD427-34 PPC 07/-3 ATA نا رد ئٹ انیس الرحمن نا بیگواہی ئے دہشتگرد ئسے نا دروشم ئٹ پاش کرے۔ ہرانا نن مذمت ئے کینہ و دا بے کاٹم آ مقدمہ نا نن قانودی وڑئٹ مون ٹی سلون۔
او پاریر کہ نن زانت و آگہی تخوکو خاہوت ئسے اُن، ای اسہ لیکچرار ئس رہینگانُٹ و سیاسی وڑ ئٹ جمعیت علماء اسلام تون بِنا آن خُڑکی تخانُٹ ہرانا جمعیت نا ضلعی قیادت گواہ ءِ۔ ننا مولانا صدیق و اونا خاہوت تون اسہ اُرا نا وڑ تعلق رہینگانے، خوشی و غم ئٹی تینتو سلیسُن اُن۔
او مُستی پارے کہ کنا مار ئے مولانا صدیق مینگل نا خلّنگ ئٹی اوار کرسہ انتظامیہ تینا نالائخی ئے ڈھکک یا راستنگا ڈوہ دار آتے بچّفنگ کن دا وڑ دروغ ئنا مقدمہ جوڑیک۔
او پارے کہ کنا مار بہاء الدین زکریا یونیورسٹی آن کمپیوٹر سائنس ئٹی گریجویٹ کننگ تون اوار اسہ خوانوکو و روزگار نا سوچ تخوکو مار ئسے، اونا و مچا خاہوت نا اسہ تنظیم ئسے تو ہم نہ خُڑکی مسّنے، نہ ارے نہ مرو۔
اونا پاننگ کہ تینا غُٹ سنگت و اُست خواہوکاتان و جماعت نا سنگت آتان خواست کیوہ کہ ایسکا عدالت آن انصاف نا زیہا جْوانو فیصلہ ئس متنے او وخت اِسکان دا وڑ ئنا دروغ آتے خف توپیرے۔
