بلوچ راج ئنا زوراکی نا بیگواہی و زنک کشی نا برخلاف ‘وائس فار بلوچ مسنگ پرسنز’ پھگہ عید ئنا دے شال ئٹی برانز کرو، ہراٹی بیگواہ غا بندغ آتا خاہوت آک بشخ ہلور۔
دا رد ئٹ ‘وائس فار بلوچ مسنگ پرسنز’ نا چیئرمین نصراللہ بلوچ تینا درشان ئٹی پارے کہ وی بی ایم پی نا کُنڈ آن عید ئنا دے چھار بجہ آ شال پریس کلب نا مونا زور ئٹ بیگواہی، ہفّنگ خلّنگ و بلوچستان ئٹی برجاء ریاستی زوراکی تا برخلاف برانز کننگو۔
او غُٹ سیاسی و خوانندہ تنظیم آتون اوار شال ئنا مخلوق نا برانز ئٹی اوار مننگ نا خواست کرے۔
ہندن عبدالرشید مری نا زور ئٹ بیگواہی نا حوال ئے اونا خاہوت وی بی ایم پی ئے تسّک۔
او پاریر کہ عبدالرشید مری باوہ نا پن ملک داد ئے دہ جون آ فوج اونا اُرا چالو باوڑی سیٹلائٹ ٹاؤن شال آن ہلک و بیگواہ کرے، اوکا پد خاہوت ئے عبدالرشید نا ہچو حوال ئس رسینگتنے و او پریشان ءُ۔
تنظیم عبدالرشید نا خاہوت ئے پارے کہ اونا معاملہ ئے بیگواہ غا بندغ آتیک جوڑ مروکا کمیشن و حکومت نا مون آ تخنگو و اونا سلامت آجوئی کن ہر جہہ آ توار ہفّنگو۔
