شال ئٹی سُم کاری، بیسیمہ ٹی کسر تدینی و ژوب ئٹی بجلی نا کرنٹ لگنگ نا تدینی تیٹ مسہ بندغ بیران مسنو۔
شال ئٹی شیخ زید اسپتال آن خُڑک نادرست آ بندغ آتا سُم کاری آن بندغ ئس کھسکنے۔ سُم کاری آن پد سِلاہ بند بندغ آک نرانو و کہوکا بندغ نا جون ئے اسپتال آ رہی کننگانے۔
پولیس نا پاننگ ءِ کہ کھسفنگ نا سوَب مُست ئنا دشمنی ئس پاننگک۔
ایلو نیمہ آ پنجگور آن خضدار آ ہِنوکا ویگن نا پرہ بجار بیسیمہ نا ہند آ ٹَیر ترخا و تدینی ٹی اسہ نیاڑی ئس کھسک و چھانڑدہ بندغ ٹپی مسر۔
ٹپی آتے اسپتال آ مون تننگانے، ویگن ئٹی غُٹ بیست بندغ سوار مسنو۔
داڑان بیدس ژوب ئٹی بجلی نا کرنٹ لگنگ آن بندغ ئس ساہ تسنے۔
ہیزئی آباد کِلی ٹی بجلی نا کھمبہ آ کاریم کننگ ئٹی کرنٹ لگّنگ آن عبدالسلام حریفال ساہ تسنے۔
المی کاروائی آن پد جون ئے خاہوت نا دوٹی تننگانے۔ حوال آتا رِدئٹ وابڈا والا دا علاقہ نا بجلی ئے ہڑدے نا وخت آن مہالو تسنو۔
