بلوچستان ئٹی جوہری تراک آتیان پد و اوفتان ودی مروکا ناجوڑی تیک پاکستانی ریاست ہچو گام ہفتنے انتئے کہ پاکستان بلوچ نا اف بلکہ اسہ کوزہ گیر ریاست اسے۔
دا خیال آتا درشانی ئے بلوچ راجی زْرمبشت (بی این ایم) شہید راشد مشکے- آواران ہنکین ئٹی اسہ دیوان ئسیٹ گپ و تْران کروکا کریر۔ دا دیوان بیست ءُ ہشت مئی نوزدہ سد و نوَد و ہشت آ بلوچستان ئٹی جوہری تراک آتا بلوچستان آ تابکاری و سیاسی اثر آتا سرہال آ اس۔
دیوان نا بھلا مہمان بی این ایم نا سیکریٹری جنرل دل مراد بلوچ اس، دیوان ئٹی بنجاہی کمیٹی نا باسک چیف اسلم، ہنکین نا نائب صدر تلار، ہنکین نا خازک میرک و شہید منان یونٹ نا سیکریٹری ریحان ہم تینا خیال آتا درشانی ئے کرے۔
ہندا سرہال آ شہید انور ایڈوکیٹ کیچ گوادر ہنکین ئٹی ہم دیوان ئس اڈ تننگا ہراٹی بی این ایم نا جونیئر جوائنٹ سیکریٹری حسن دوست جوہری تابکاری نا بلوچستان آ اثر آتیا ہیت کرے۔
او پارے کہ بیست و شش سال گدرینگ آن پد ہم راسکو و ایب ءَ کھیب نا مخلوق ویل آتا گواچی ءِ، سِل و دتر نا ناسور اوڑے لس مسّنے، دا تجربہ آتان مہالو بھاز کم دا ناجوڑی نا حوال بسّکہ داسا ہر سال کیہی بندغاک دا ویل آن دنیا ئے الّیرہ۔
گپ کروکا پاریر کہ بلوچ راج ئنا برخلاف پاکستان ہر وڑ ئنا چم کننگ ئٹی ءِ؛ نشہ، بےخوانندئی، زور ئٹ مخلوق ئے تینا ڈیہہ آن ہمپفنگ۔ اینو پاکستان چین ئتو اوار تمسہ بلوچ راج ئے شیف بِٹنگ خواہیک۔ ڈیرہ بگٹی، ریکوڈک و گْوادر آن مال مڈی تے لُٹ و پُل کننگ ئٹی و بلوچ مخلوق بھاز خْوارو وخت تیر کننگ ئٹی ءِ۔ بلوچ راج ئے غلام جوڑیسہ اودے تینا وطن نا واک و اختیار آن پد تخنگانے۔
او پاریر کہ بیرہ زیبا آ نعرہ و زیبا آ لوز آتان بدلی بفک، ننے تینا و تینا بروکا پیڑی تا آسراتی کن آجوئی نا جہد ئٹی قربانی چوئی تمّو و راجی ادارہ آتے سوگو کننگ مرو۔ ہر جہدکار ئے تینا زانت و کمال نا حساب آ راجی مکست کن جہد ئنا پِڑ آ بروئی تمّو۔ ننا مہراک، ننا اسٹی تینا وطن و راجی سیاسی کاریم کروک آتیکن مروئی ءُ و ننا نفرت و خار بلوچ راج ئنا بد آتیک مروئی ءِ، داڑان ننے تینا مکست ئٹی سرسوبی رسینگو۔
