ماحولیاتی چاہندار و سرگرم باسک آک جمعہ نا دے پاریر کہ ہفت سیر انگا ڈیہہ تا ٹولی، اٹلی ٹی مروکا بھلا مجلس ئٹی ماحولیاتی بدلی آ پُوسکنو اہم گامگیج ئس کننگ ٹی بے سوب مسُر، و او بیرہ ہنوکا وعدہ آتا تران کریر۔
گلوبل سٹیزن نا نائب صدر فریڈریک روئڈر پارے کہ”ٹولی سیون نا سروک آک اُرا ٹی مننگ کریرہ۔ پُوسکنو ہچو عہد کننگ متو۔“
پگلیہ ٹی مروکا مجلس ئٹی اوار مروکا سروک آک اپریل ئٹی تینا ماحولیات نا وزیر آتا کنڈ آن دا عہد نا پک کریر کہ ”2030 نا دہائی آن مُست نیم بشخ ئنا وخت ننا توانائی نا نظام ئٹی کوئلہ آن بجلی نا ساڑی پیداوار ئے مرحلہ وار ایسر کننگو۔“
واہم دائسکان پڑو ئٹی گچین کروک وخت ئنا تہٹی صنعتی دور ئنا کرہ ارض نا درجہ حرارت آن زیات ڈیڑھ ڈگری سینٹی گریڈ اسکان حد ئنا تہٹی تخنگ نا سلسلہ ٹی ملک آ تیکن کاربن گیس آ تا صفر اخراج ئٹی مَنہ گنجائش الانو۔
کلائمیٹ اینالٹکس پالیسی انسٹی ٹیوٹ نا رد ئٹ، جی سیون نا ڈیہہ تا 2021 ئٹی عالمی معیشت ئٹی تیبئی وڑ ئٹ 38 درسد نا کچ اسکان بشخ اسک و کل گرین ہاؤس گیس آ تیٹی 21 درسد اخراج نا زمہ وار اسر۔
ماحولیاتی بدلی ئے توننگ آ کاریم کروک مواصلاتی فرم GSCC نا نکولا فلیمنگی پارے کہ معدنی ایندھن نا تقریبا 30 درسد ودی کننگ نا زمہ وار گروپ نا گیس مسلسل عوامی سرمایہ کاری کن در ئے یلہ الانے۔
برطانیہ، کینیڈا، فرانس، جرمنی، اٹلی،جاپان و امریکہ ہم 2025 آن پد مُد ئنا بدلی کن فنڈنگ نا اَسہ پوسکنو ہدف ئسے آ اتفاق نا خواست ءِ پک کریر۔
مُد ئنا کیہی سرگرم باسک آک خیسُن و باسُن بحیرہ روم آن پیشتموکا خاخر ئٹ زیتون نا اَسہ رخت ئسے نا ہُشنگوکا عکسی آ ٹی شرٹ بینِسہ، جی سیون نا میڈیا سنٹر نا پیشن آ اَسہ برانز ئس کریر۔
یورپ کُل آن تیزی ئٹ باسُن مروکا براعظم ءِ و بحیرہ روم خاص وڑ ئٹ مُد ئنا بدلی تا سوب آن خشکی آن ہلیس ہار اسکان سخت مُد ئنا تُدینی تا گواچی ءِ۔
اطالوی وزیراعظم جارجیا میلونی، ہرا نا سخت راست دو ئنا حکومت یورپی گرین ڈیل نا خلاف ووٹ تسس، سربراہی مجلس نا اَسہ سیشن ئسیٹی پارے کہ مُد ئنا بدلی آن ” نظریاتی نقطہ نظر آن بیدس“ مون تننگ بکار ءِ۔
ولے سرگرم باسک آک برمتہ خلکُر کہ اطالوی تیل و گیس نا بھلا کمپنی ای این آئی نا سی ای او نا ” افریقہ، توانائی و ماحولیات“ آ رہنما نا اَسہ راؤنڈ ٹیبل آ ساڑی مننگ ظاہر مریک کہ روم سیاسی و معدنی ایندھن نا مفادات آپس ٹی اخس زیات اوار ءُ ۔
ای سی سی او تھنک ٹینک نا کو فاؤنڈر لوکا برگماشی اے ایف پی ءِ پارے کہ دا ہیت ئنا ہچ ثبوت اف کہ افریقہ ٹی گیس بندغ آ تا ضرورت آ تے صفا توانائی و برقی توانائی آن بہتر و سستا طریقہ آن پورا کیرہ۔
او پارے کہ داڑان چپ افریقہ ٹی گیس ئنا سرمایہ کاری نا السی بجٹ آ منفی اثر تمیک و دا وام تا اَسہ بدتر مروکا بحران ئے مون آ دننگ ئٹی کلیدی عنصر ءِ۔
ماہرین افریقی ملک آ تا مُد ئنا بدلی نا برخلاف جنگ کننگ ئٹی کمک کروکا جہانی بینک ئنا انٹرنیشنل ڈویلپمنٹ ایسوسی ایشن ئٹی اہم شراکت دار مننگ کن گروپ سیون نا عزم ٹی کمیتی نا ہم نشاندہی کر۔
افریقہ ٹی غربت و قابل معیار علاج بیماری تیکن کوشست کروک اَسہ بے منافع بخش تنظیم ” ون کمپین“ جی سیون نا ”بقول اونا بے معنی درشان“ ئے تنقید نا گواچی کرے۔
اونا ایگریکٹو ڈائریکٹر ڈیوڈ میک نیئر پارے کہ دا سال ئنا سربراہی کانفرنس نا مطلوبہ مسخت نا دوئی کننگ ٹی بے سوب مسُنے۔
