‘وائس فار بلوچ مسنگ پرسنز’ نا چیئرمین نصراللہ بلوچ پارے کہ عبدالطیف بلوچ نا زور ئٹ بیگواہی نا حوال ئے اونا خاہوت وی بی ایم پی ئے تسنے۔
اوفک پاریر کہ عبدالطیف بنگلزئی /بابو سفر خان نوزدہ مئی اِرا ہزار بیست و سئے آ تینا خاہوت تون کابو آن مستونگ آ بنّنگ ئٹی اس کہ اودے بیگواہ کریر و داسکان عبدالطیف نا بارٹ اوفتے حوال تننگپک ہرانا سوَب آن اونا خاہوت فرشان ءِ۔
او (نصراللہ بلوچ) پارے کہ تنظیمی حوالہ ئٹ عبدالطیف نا خاہوت ئے پارین کہ اوفتا معاملہ ئے کمیشن و حکومت ئے رسیفنگو و اونا سلامت آجوئی کن ہر پِڑ آ توار ہفّنگو۔
نصراللہ بلوچ ریاست آن خواست کرے کہ عبدالطیف بنگلزئی آ ڈوہ ئس ارے تو اودے پھاش کننگہ عدالت آ ہتنگہ، اگہ بےگناہ ءِ تو زوت اودے یلہ کیر اونا خاہوت ئے مچا زند ئنا دڑد آن کشّیر۔
