شال و خضدار ئٹی بلوچ خوانندہ و بیگواہ آ بندغاتا خاہوت آتا کنڈ آن انیس بلوچ و فاروق تون اوار زور ئٹ بیگواہی و بیگواہ غا خوانندہ آتا بےآجو مننگ نا برخلاف برانز کننگا و ریلی ئس کشنگا۔
شال ئٹی درو زور ئٹ بیگواہ کننگوک فاروق بلوچ نا خاہوت بلوچستان یونیورسٹی نا مون آن ریلی ئس کشا ہراٹی خوانندہ و ایلو مخلوق بھلو کچ ئسیٹ بشخ ہلک و زوراکی نا بیگواہی تے بند کننگ نا خواست کرے۔
فاروق بلوچ نا خاہوت داکان مہالو شال ئٹی تولوک برانز کرے، ہراڑے انتظامیہ نا اکرار آن او تینا برانز ئے پد بٹیر ولے فاروق بلوچ نا بےآجو مننگ نا برخلاف خاہوت و بلوچ خوانندہ آک ولدا برانز کننگ ئٹی ءُ۔
ایلو نیمہ آ خضدار ئٹی زوراکی ئٹ بیگواہ مروک انیس بلوچ و فاروق بلوچ نا آجوئی کن انجینئرنگ یونیورسٹی خضدار ئٹی خوانندہ آک برانزی ریلی ئس کشار و اوفتے یلہ کننگ نا خواست کریر۔
اوفتا پاننگ اس کہ بلوچستان ئٹی بھلو وخت ئسے آن زوراکی نا بیگواہیک برجاء ءُ، وختس زوراکی نا بیگواہی ٹی ترندی ہتنگک۔ دا تُو ئٹی بھاز آ جاگہ آتان خوانندہ آک بیگواہ کننگانو۔
او مُستی پاریر کہ زوراکی نا بیگواہی تا گیشتر مننگ پریشانی نا ہیت ئسے، بیگواہ فاروق بلوچ و انیس بلوچ ئے زوت پھاش کننگہِ و ہفّنگ دنّنگ بیگواہ کننگ بند مرے۔
