بیگواہ غا بلوچ آتا آجوئی کن ‘وائس فار بلوچ مسنگ پرسنز’ نا بین برانز کیمپ ئے پنچ ہزار چھار سد و ہفتاد و شش دے مس۔ بی ایس او پجار نا چیئرمین بوہیر صالح و اونا کابینہ نا سنگتاک کیمپ آ بِرسہ اواری نا درشانی کریر۔
وی بی ایم پی نا وائس چیئرمین ماما قدیر بلوچ پارے کہ پاکستانی ریاست بلوچ وطن آ تینا کوزہ ئے مرغن کننگ کن ہڑدے پوسکنو چم کرسہ بلوچ ورناتے بلوچستان و پنجاپ نا یونیورسٹی تان زور ئٹ بیگواہ کیک تاکہ بلوچ خواننگ کننگ کپ۔
ماما قدیر بلوچ پارے کہ بلوچستان ئٹی ورنا تا زور ئٹ بیگواہی لس مخلوق آ بمباری و چُنا نیاڑی تے خلّنگ پاکستانی فوج ئنا ہڑدے نا کاریم جوڑ مسنے و ریاستی زوراکی بلوچ نا زند ئنا بشخ مسّنے، دا مچا ظلم و تادی بلوچ راج ئنا جہد ئے آشوبی رنگ تننگ ئٹی ءِ و بلوچ تینا جہد ئے سرسوبی نا کُنڈا دننگ ئٹی ءِ۔
ماما قدیر بلوچ پارے کہ پاکستانی ریاست بلوچ جہد ئے تہہ ئنا و پیشن نا حساب آ نزور کننگ کن فوج، ڈھکوک ادارہ و پِن ئنا سیاسی حربہ آتان کاریم ہلکنے و ہلنگ ئٹی ءِ۔
ماما قدیر بلوچ نا پاننگ ءِ نوا کہ ‘اقوام متحدہ’ و بندغی حق آتا دعویٰ کروکا تا اثر تمے و پاکستانی ریاست آ زور شاغر و بندغی حق آتا لتاڑ و ظلم آتیکن جہانی قانود نا رِدئٹ اوڑان ہرّفنگ مرے۔ ہندن غُٹ ل ویل آتا روتہ بلوچ راجی سوال ءِ و اونا تاریخی حوالہ ئٹ حل کننگ و بلوچ راجی اختیار ئے مننگ ئٹی تینا کڑد ئے نشان تیر۔ داسا ہُرنہ کہ بیگواہ غا بلوچ آتا خاہوت آتا و بلوچ راج ئنا اومیت آتا ‘اقوام متحدہ’و ایلو جہانی طاقت آک اراڑیسکان دھڑنگ کیرہ۔
