بلوچ دریاب ئٹی حکومت بلوچستان نا ماہی گیری محکمہ و پاکستانی لشکری ادارہ آتا دو آن بے قانودی مچھی ہلّنگ زیات مننگ ئٹی ءِ، ٹرالر مافیا نا بھلو کچ ئس مچھی تے ہلنگ ئٹی ءِ ہراڑان جہی آ مچھی ہلوک آک تینا اِرا وخت ئنا اِرغ کن فریشان ءُ۔
ہندی حوال تا رِدئٹ ہفت تلار پسنی گْوادر ئٹی بے قانودی ٹرالر مافیا بھلو کچ ئسیٹ کاریم کننگ ئٹی ءِ۔
ہَندی مچھی ہلوکاک بےقانودی مچھی ہلوکا گجہ ٹرالرز نا ویڈیو ئس شنگ کریر ہراٹی خننگک کہ دریابی شار پسنی اسہ وار ولدا ٹرالر مافیا نا کوزہ ٹی ءِ، سندھ و پیشن نا گجہ ٹرالر آک ہفتلار پسنی ٹی بھلو جال شاغنگ ئٹی ءُ۔
ہفتلار نا ہیب ءَ کھیب ئنا دِیر ئٹی پیشن نا و سندھ ئنا گجہ ٹرالر آک ویتہ خُلیس آن بےقانودی شکار ئٹی آختہ ءُ۔
ویڈیو ٹی خننگک کہ محکمہ فشریز نا گشتی دستہ آک ہچ خننگپسہ۔
یات مرے کہ پسنی تون اوار مچا گوادر ئٹی روزگار نا بھلا وسیلہ مچھی ہلّنگ ءِ، اوڑے سمندر ئٹی ٹرالر آک بےقانودی شکار کننگ ئٹی ءُ ہرانا سوَب آن مچھی ہلوکا تا ہزار آ خاہوت آتا روزگار نا وسیلہ چھٹنگ ئٹی ءِ۔ ایلو نیمہ آ حکومت بلوچستان و محکمہ فشریز ٹرالر آتے چٹ یلہ الانو۔
