بلوچستان نا ہند ماشکیل و کیچ آن پاکستانی لشکر اِرا ورناتے دزگیر کننگ آن پد زوراکی ئٹ بیگواہ کرے و ہرنائی آن بیگواہ ءُ ورناس آجو مرسا اُراغہ سر مس۔
ماشکیل ئٹی پاکستانی لشکر و ریاستی ڈیتھ اسکواڈ آک اسہ ورناس ئے دزگیر کننگ آن پد زوراکی ئٹ بیگواہ کریر ارانا پجار قدیر بلوچ ولد حاجی محمد ابراہیم محمد حسنی نا پن ئٹ مسونے۔
حوال آتا رد ئٹ قدیر تینا سنگت ئسیتون ماشکیل بازار آن ہننگ اسک کہ بابا قاضی چوک آن اسہ تایلنڈی لاری ئس اراٹی پنچ کارندہ سوار اسک اوفک سر مننگ تون سُمکاری کریر و پدا قدیر ئے دزگیر کرسا تینتون دریر۔
ایلو نیمہ آ کیچ ئنا ہند میری کلگ آن اسہ ورناس ہنوکا شش دے آن بیگواہءِ ہندُن خُلیس ءِ کہ اودے پاکستانی لشکر زوراکی ئٹ بیگواہی نا گواچی کرینے۔ ارانا پجار دادشاہ ولد عبدالرحیم بلیدہ سلو نا ہندی ئٹ مسونے دادشاہ تینا کاریم ئسے کن تربت آ بسس۔
ہرنائی آن اسہ توو ئس مُست بیگواہ مروکا شبیر احمد مری آجو مس۔
