گْوادر سربندن آن پولیس نا دُو آن زوراکی ئٹ بیگواہ مروکا سمیر بلوچ نا خاوت تینا شینگ مروکا درشان ئٹی پارینے کہ 9 مئی 2024 آ گوادر سربندن آن پولیس ایس ایچ او سہب ئنا چار بجہ نا وختا سمیر حمزہ ئے تینا مُسہ پولیس کارندہ تون اوار سر و سوج نا پِن آ اُرا آن دزگیر کننگ آن پد دریر ہرا دائسکان بیگواہ ءِ۔
اوفک پاریر کہ بیگواہی آن مُست دے ئس سہب ئنا کیہی پولیس کارندہ بسُر اُرا ئے پٹار و سمیر حمزہ نا بابت ئٹ ہریفیر کہ او اَرادے، او وخت او اُرا ٹی الو انتئے کہ او سمندر آ ہناسس۔
او پاریر کہ سمیر بلوچ ئے دا مسٹمیکو وار ءِ کہ پاکستانی لشکر زوراکی ئٹ بیگواہی نا گواچی کرینے۔ او اَسہ خوانندہ ئسے و اونا بیگواہ مننگ آن اونا خواننگ زیمی مننگ ءِ، او پاریر کہ ہرا دے آن اودے پولیس اُرا آن دزگیر کرِسہ درینےہمو دے آن او بیگواہ ءِ۔
خاہوت پارے کہ نن ہر وڑ ئٹ کوشست کرین، وختس ڈپٹی کمشنر نا پارہ غا فراد درین برس ایم پی اے گْوادر مولانا ہدایت رحمان نا پارہ غا ہنان کہ ننا بندغ بے ڈوہ ءِ، و او بیرا تسلی تسُنے کہ اگہ سمیر آ کیس افک تو اودے آجو کننگو۔
خاوت درشان ئٹی سختی ئٹ پارینے کہ اگہ سمیر حمزہ اِرا دے ئٹی آجو متو نن بیوس مرِسہ کوسٹل ہائی وے ئے بند کرِسہ برانز کرون۔
او پاریر کہ نن داکان مُست توار اندا سوب آن ارفتون کہ ننتو وار وار وعدہ کننگاسس کہ اودے پگہ یا ایلو دے آجو کرون، عملی وڑ ئٹ انتظامیہ نا کنڈ آن آجوئی نا ہچو اومیت خننگپک۔
