بلوچستان نا ضلع کیچ آن پاکستانی لشکر نا دُو آن جتا وخت ئٹ زوراکی ئٹ بیگواہ مروکو ہفت بندغ آجو مرِسہ تینا اُرا ئے سر مسُنو۔
زامران ئٹی زوراکی ئٹ بیگواہ مروک ورنا آجو مس ولے سنگت تہ دائسکان بیگواہ ءِ۔
بیگواہ آ ورنا داؤد عبدالوہاب آجو مرِسہ ہنوکا شام تینا اُرا ئے سر مس، اوڑتون اوار بیگواہ مروکا اونا سیال شہزاد عبید دائسکان بیگواہ ءِ۔
یات مرے کے داؤد عبدالوہاب و شہزاد عبید ئے نوانو زامران آن بیگواہ کریسُر۔ اوفتا آجوئی کن اوفتا خاؤت پنچ دے اسکان ڈی سی کیچ ئنا دفتر نا مونا برانز ئٹی بشخ ہلکسُر۔
اندن آبسر کولواہ ڈنے بازار نا ہندی اَسہ خاؤت نا چار ورنا وسیم حسن، اعجاز شیران، صالح طارق وامتیاز اقبال دَرو شام ئنا آجو مرِسہ تینا اُرا ئے سر مسُنو۔
دا ورنا تے 17 مئی 2024 آ اوفتا اُرا آن بیگواہ کریسُر، یاتی مرے کہ ہندا ورنا تا خاؤت ڈی سی کیچ ئنا دفتر نا مونا برانز کریسر وخاوت نا رد ئٹ اوفتیٹی اَسہ ورنا صالح طارق و اونا سنگت بھاز بے دادی نا سوب آن ذہنی نزور مسنو۔
13 جون 2021 تُربَت آپسر آن زوراکی ئٹ بیگواہ مروکا عبدالباسط ولد عبدالوہاب 6 جون 2024 آ آجو مرِسہ تینا اُرا ئے سر مس۔ خاؤت اوفتا آجوئی ئے پک کرینے۔
ہندون 11 مئی 2024 آ اُرا آن سی ٹی ڈی نا دُو آن زوراکی ئٹ بیگواہ مروکا حیات بلوچ ہم ہفت جون آ آجو مس، حیات بلوچ نا زوراکی ئٹ بیگواہی نا مَنہ دے آن پد سی ٹی ڈی اونا دزگیری ئے ظاہر کریسس۔
حیات بلوچ نا آجوئی نا حوال ئے بلوچ یکجہتی کمیٹی کیچ پک کرینے۔
