بلوچ خوانندہ راہشون زاکر مجید بلوچ نا زور ئٹ بیگواہی ئے پانزدہ سال مس، ہشت جون آ اونا خاہوت نا کُنڈان برانزی مظاہرہ ئس کننگو۔
بیگواہ زاکر مجید نا لمہ تینا کُلو ئس شنگ کرسہ پارے کہ کنا مار ئے پانزدہ سال مہالو پاکستانی فوج و ادارہ آتا کارندہ آک ہلکُہ دریر ہراکا پد او داسکان بیگواہ اے۔
یات مرے زاکر مجید بلوچ، بلوچ اسٹوڈنٹس آرگنائزیشن آزاد نا راہشون آتان اے، ہرادے پانزدہ سال مُست ایلو سیاسی کاریم کروک آتان بار پڑنگ آباد مستونگ آن فوج و ادارہ آتا کارندہ آک ہلکُہ بیگواہ کریر۔
زاکر مجید نا ایڑ فرزانہ مجید بلوچ شال آن کراچی و اسلام آباد اسکان مارچ کننگ تون اوار شال و کراچی نا پریس کلب و ایلو جاگہ آتا تینا بیگواہ ایلم کن توار ہفّینے۔
زاکر مجید بلوچ نا بیگواہی ئے پانزدہ سال سرجم مننگ آ ‘بلوچ سوشل میڈیا ایکٹوسٹ’ سوشل میڈیا آ مہم ئسے نا پڑو کرینے۔
خاہوت شال ئنا غُٹ آگاہی تخوکا مخلوق آن برانز ئٹی اوار مننگ نا خواست کرینے۔
ہندن ہشت جون ئے بلوچ بیگواہ تا پِن آ کننگانے ہراڑا گیشتر بیگواہ بندغاتا مسئلہ تالان کننگک۔
بلوچ اسٹوڈنٹس آرگنائزیشن آزاد نا بنجاہی جارکش بلوچ بیگواہ تا دے ئکن درشان ئسیٹ پاریسس کہ بلوچ اسٹوڈنٹس آرگنائزیشن آزاد ہر سال ہشت جون ئے بلوچ بیگواہ تا پن آ یات کیک۔
ہندا وڑ دا سال زور ئٹ بلوچ بیگواہی تا دے آ مچا ہفتہ سوشل میڈیا آ مہم چلّفنگو و تنظیم نا غُٹ ہنکین تے پاننگک کہ بیگواہ تا دے آ دیوان اڈ تیر۔ دا ہفتہ مُچ مہم ئٹی بھاز وڑ ئنا کاریمک مرور و زور ئٹ بیگواہی تا دے آ بیگواہ تا خاہوت آک، ہمو بیگواغا بندغاک ہرا دشمن نا دُو آن سزا کنگنُہ، جہانی و بندغی حق آتا ادارہ، سیاسی و چاگڑدی کاریم کروک و غُٹ مخلوق آن خواست کینہ کہ او دا مہم ئٹی زیات بشخ ہلیر۔
