شال پولیس ڈاکٹر ماہ رنگ و ایلوفتیا پریس کلب شال ئنا کُلف آتے پرغنگ نا برخلاف ایف آئی آر کرینے۔
ایف آئی آر ئٹی پاننگانے کہ ڈاکٹر ماہ رنگ بلوچ، صبغت اللہ بلوچ و بیبگر بلوچ ہژدہ مئی آ عدالت روڈ آ برانز کرسہ کسر ئے تفیر و پریس کلب نا کُلف آتے پرغسہ پاکستان نا برخلاف نعرہ خلکو و تقریر کریر۔
پولیس نا دعوی ءِ کہ ہندا دے حالت آتا خرابی نا سوَب سول انتظامیہ پریس کلب و میٹرو پولیٹن ئے بند کریسس۔
ہندا دے بلوچ یکجہتی کمیٹی "گوادر میگا پروجیکٹ آن میگا جیل اسکان” نا پن آ شال پریس کلب ئٹی کانفرنس ئس اڈ تننگ ئٹی اس ولے اوفتا سرمننگ آن مہالو انتظامیہ پریس کلب ئے کُلف خلِسہ بند کریسس۔
دا بارو ئٹ بلوچستان نا صحافی یونین نا صحافیک پریس کلب نا کُلف خلّنگ آ افسوس کریر و پاریر کہ دا وڑ ئنا کاریمک صحافت آ جلہو ءُ و آئین نا آرٹیکل نوزدہ نا برخلاف ءُ۔
شال پریس کلب نا کُلف بندی نا برخلاف صحافیک بلوچستان اسمبلی نا دیوان آن ہم بائیکاٹ کریسر۔
صحافیک پریس کلب ئے کُلف خلّنگ آ انتظامیہ نا برخلاف نعرہ خلسہ ڈپٹی کمشنر ئے معطل کننگ نا خواست کریسر، پدا وزیراعلیٰ بلوچستان نا پاننگ آ بلوچستان اسمبلی نا دیوان آن واک آؤٹ ایسر کننگاسس، ہراٹی صحافی تا کُنڈان چھار خواست وزیر اعلیٰ نا مونا تخنگاسس۔
