اقوام متحدہ نا سروک پنچ شمبے آ غزہ ٹی اقوام متحدہ نا بست و بند ئٹ چلّوکا اسکول آ اسرائیلی جلہو نا مذمت ئے کرے ہراٹی سی و ہفت بندغ خلنگاسُر۔
اسرائیلی فوج ئنا دوبہ ئے کہ اسکول غزہ نا اسپتال ئسے نا وڑ ئٹ حماس نا کاریم ئٹی بسّکہ۔
اقوام متحدہ نا سیکریٹری جنرل انتونیو گوتیرس نا جارکش اسٹیفن دوجارک پارینے کہ دا ہمو نہاد نا اسہ بیم تروک مثیل اسے ہرادے لس مخلوق تننگ ءِ، ہرادے بیرہ زندہ رہینگ نا کوشست کروکا فلسطینی نرینہ، نیاڑی و چُناک تنّنگ ئٹی ءُ۔
دوجارک پارے کہ او (گوتریس) دا جلہو نا مذمت ئے کیک۔ غزہ ٹی ہنتس مسّنے اونا حساب کتاب مروئی ءِ۔
اسرائیلی فوج ہرا اسکول ئے خلکنے او اقوام متحدہ نا فلسطینی باہوٹی تا ادارہ یو این آر ڈبلیو نا بست و بند ئٹ چلّاکہ و غزہ جنگ آن بروکاک اوڑے باہوٹ مسرہ۔
اسرائیلی جلہو آن پد دیر البلاح ٹی الاقصی شہداء اسپتال ئٹی سی فلسطینی نا لاش ہتنگا۔
اسرائیلی فوج پارینے کہ اونا جہاز آک اسکول آ جلہو کرینو، ہرانا بارٹ او ثبوت تننگ آن ویتہ دعوی کرے کہ حماس و اسلامی جہادیک دا کاریم تیک تینے ہنداڑے ڈھکارہ۔
ایلو نیمہ آ اقوام متحدہ نا ادارہ نا پاننگ ءِ کہ غزہ جنگ ئنا بِنا آن اونا انتظام ئٹ چلّوکا خواننگ جاہک پناہ گاہ نا وڑٹ کاریم ئٹی ہتنگارہ۔
خواننگ جاہ آ جلہو ہندنو وخت ئسے آ مسنے ہراتم امریکی صدر جو بائیڈن بھلا کمک کار آک جنگ بندی نا حوالہ ئٹ مشرق وسطیٰ ٹی ءُ۔
فلسطینی صحت نا شعبہ پارینے کہ پنچ شنبے آ کوزہ مروک دے کیہلینگ پارہ آ شار جنین ئٹی اسہ چھاپہ ئسیٹ مسہ فلسطینی ئے خلنگانے، ہندن فوج ئنا پاننگ ءِ کہ او "جہد کار تے” چھٹفینے۔
فلسطینی ہلال احمر نا پاننگ ءِ کہ دا جلہو ئٹی پین سینزدہ بندغ ٹپی مسّنو۔
