بی ایل ایف نا ترجمان تینا شنگ کروک بیان ئٹی پارے کہ بلوچ سرمچار آک ایم آئی و آئی ایس آئی نا اِرا کارندہ حمید اللہ ولد اختر پنجگور نا ہندی ئے پنجگور قلم چوک آ و حمزہ ئے قلات نا ہند شور پارود ڈور ئٹی ٹک کرِسہ اونا توفک گڑاتے ہرفیر۔
او پارے کہ راجی مجرم حمید اللہ اسہ سرمچار ئس اسک او پاکستانی لشکر نا مونا 2016 ئٹی سلاہ بِٹنگ آن پد پاکستانی لشکر، ایم آئی و آئی ایس آئی نا جوڑ کروک بیرہ پن ئنا سی ٹی ڈی کِن کاریم ئٹی اسک۔ ہندا راجی مجرم بلوچ سرمچار آتا برخلاف دشمن نا خاصءُ کارندہ ئس مننگ آن بیدس پین کیہی چاگڑدی خرابی تیٹی اوار اسک۔
ترجمان پارے کہ دانا زی آ نظر تخنگ کِن اسہ خصوصی ٹیم ئس اڈ تننگا ہرا ہندا راجی مجرم نا ہن و بر آ سخت نظر تخا۔ چار جون آ اونا ساڑی مننگ نا حوال رسینگ آن پد بلوچ سرمچار آک کاروائی کرِسہ اودے خلکُر۔
او پارے کہ ہندا وڑئٹ اسہ پین کاروائی سیٹی سرمچار آک خاران ئٹی کاریم کروک ڈیتھ اسکواڈ نا خاص اِنگا کارندہ حبیب اللہ مردانشہی نا دستِ راست حمزہ ئے سُمکاری کرِسہ خلکر۔
او ودیک پارے کہ ہندا راجی مجرم قوضہ گیر پاکستانی لشکر، ایم آئی و آئی ایس آئی نا جوڑ کروک ہندی ڈیتھ اسکواڈ نا بھلا حبیب اللہ مردانشہی اراکہ بدنامِ زمانہ علی حیدر محمد حسنی نا دستِ راست کن کاریم کننگ ئس۔
او پارے کہ دا راجی مجرم خاران نا جتا جتا غا ہند آتیٹی چاگڑدی خرابی تون اوار سرمچار شہید شمس بلوچ، ڈاکٹر شعیب عرف گزین و ظفر بلوچ نا شہید کننگ ئٹی براہ راست تُد اسک۔
ترجمان نا پاننگ اس کہ بندغ آتے برمتہ کرِسہ پاکستانی لشکر نا دوٹی تننگ نا وڑءُ بھلو جرم آتیٹی ہم مجرم حمزہ اوار مسُنے۔ اونا جرم آتا پک انگا ثبوت مننگ نا بنیات آ 5 جون آ بلوچستان لبریشن فرنٹ نا سرمچار آن اودے خلنگ نا فیصلہ کریر و راجی مجرم ئے خلنگ آن پد سرمچار آک اونا سلاہ و ایلو گڑاتے تینتون دریر۔
او ایسر ئٹ پارے کہ بی ایل ایف دا راجی مجرم آتا خلنگ نا ذمہ واری ئے ہرفک۔ مجرم آتا ڈوہ تے ہرُسہ اوفتے سزا تننگا۔ بلوچ چاگڑد و بلوچ راجی جنز ئنا برخلاف کاریم کروکا کُل عناصر تے خبڑدار کننگِک کہ اوفک تینا دننگا کاریم تیان دو کشیر اگہ نہ اوفتے ہندنو ایسر ئس مون تروئی تمو ہرا اوفتا بروکا نسل آتیکن ہم ملامتی نا سوب مرو۔
