بلوچستان نا ضلع کیچ ئنا بھلا شہر تربت ئٹی بیگواہ آ بندغ آتا خاہوت آتا نیمہ آن ڈپٹی کمشنر نا دفتر نا مونا برجاء انگا برانز پنجمی دے آ مذاکرات آن پد ایسر کننگا۔
بلیدہ آن بیگواہ مروکا بندغ آتا 12 خاہوت آتا نیمہ آن پنچ دے آن برجاء انگا برانز ڈپٹی کمشنر کیچ ابراہیم اسماعیل تون مذاکرات آن پد برانزئے ایسر کننگ نا پڑو کریر۔
بیگواہ انگا بندغ آتا خاہوت آتا پاننگءِ کہ ضلعی انتظامیہ بروکا مُسہ دے آ بلیدہ بیگواہ مروکا 12 خاہوت آتا بندغ آتے آجو کریفنگ کن المی دیمرئی نا یخین تسونے ہندا سوب آن نن تینا برانزئے دوارہ ہرفنگ اُن۔
خاہوت آتا پاننگءِ کہ اگہ بروکا مُسہ دے تہ انتظامیہ تینا قول ئے پورو کننگ ئٹی سوب مند متو گُڑا ننا مون ئنا لائحہ عمل داکان سخت مرو۔
یاتی مرے کہ خاہوت آک 02 جون ئنا دے بلیدہ آن مارچ کرسا تربت آ سر مس اُسر اراٹے اوفک پنچ دے آن ڈپٹی کمشنر آفس نا مون برانز کننگ اسُر ہندا وخت اوفک تربت ئٹی ریلی ہم کشار و جلسہ کریر۔
برانز ئٹی چُنا و زالبول آتا بھلو کچ ئس اوار مسونے ارافتا خواست مسونے کہ اوفتا بیگواہ مروکا بندغ آتے آجو کننگ مرے، اگہ کس ئسے آ دوبہ ئس ارے گُڑا اودے عدالت آتا پیش کننگ مرے۔
