بیگواہ غا بندغ آتیکن ڈپٹی کمشنر کیچ ئنا دفتر نا بھلا دروازہ غا تولوک برانز برجاء ءِ۔
سئے شمبے آ ضلعی کونسل نا کماش ہوتمان و اے ڈی سی کیچ خلیل مراد تولوک برانز آ ہنار گپ و تران کن خاہوت آتو اِرا گھنٹہ توسر ولے ہِچو نتیجہ ئس پیشتمتو۔
خاہوت آک بیگواہ تا آجوئی تون برانز ئے تفیر و پاریر کہ داڑے ہخس خاہوت توسنے اوفتا بندغاک آجو متوس تو او ل تولوک برانز ئے چُھٹفپسہ و ڈی سی نا دفتر نا دروازہ ئے ملنگ الّیپسہ۔
چیئرمین نا کُنڈان گپ و تران ئٹ تولوک برانز ئے چھٹفنگ نا ہیت ئے خاہوت آک منّتوس و پاریر کہ داکان مہالو ہم ننے دا وڑ ئنا اُست تنّنگانے ولے ہِچ متنے، نن دہُنا اکرار آتا بھروَسہ کننگ کپنہ۔ او پاریر کہ نن بلیدہ آن بیوس مرسہ مارچ کرین تربت آ بسّن داسا جْوانو گام ئس ہفّنگ آن ویتہ ولدا ہنوفن۔
داکان مُست چیئرمین ضلع کونسل کیچ میر ہوتمان ضلعی انتظامیہ نا کُنڈان خاہوت آتے دھرنا ئے چھٹفنگ و ولدا ہِننگ نا پاریسس کہ اوفتا بیگواہ بندغاتا آجوئی کن کاریم کننگو و اوفتے زوت جْوانو خبر رسینگو۔
