نیشنل ڈیموکریٹک پارٹی نا جارکش تینا درشان ئٹی پارینے کہ بلوچستان نا غُٹ بھلا خواننگ جاہ و کیمپس آک خرابو حالت سے ٹی ءُ، مالی معاملہ و ایلو مسئلہ آتا گواچی ءُ۔ وڈھ کیمپس ٹی میرٹ آ استاداک برسہ ہفت سال آن جامعہ ٹی خوانیفرہ، اوفتا جاگہ آ ولدا پوسکن نوکری تننگ نا ہیت سفارش کروکاتے بَٹِنگنگ اے۔
او پارے کہ استاداک ہنوکا سی ءُ شش دے آن برانز آ تولوک ءُ ولے انتظامیہ تینے بےخبر کرینے۔
این ٹی ایس آن بارنگا ادارہ آتان ٹیسٹ ہلسہ پینل انٹرویو آن پد ہرافتے نوکری تننگا و ہر سال سینڈیکیٹ دیوان ئٹی ریگولائیز نا آسرا آ اوفتا وخت ئے ضائع کننگا، داسا اوفتے ہندا ادارہ آن کشنگ نا کوشش کننگک ہرا غیر قانودی و غیر اخلاقی ءُ کاریم ئسے۔
جارکش پارے کہ مہالو آن ٹیسٹ و انٹرویو ٹی پاس مروکا استاداک ہرا ہفت سال آن خوانفنگ ءُ، چانسلر، وائس چانسلر، ڈائریکٹر وڈھ کیمپس اوفتا دا تجربہ ئے پدی کرسہ اوفتے ریگولر کننگ نا جہا پوسکنو نوکری تننگ نا پِن آ کرپشن و سفارش کن کسر ملنگ خْواہیرہ۔ ہندا سفارش و کرپشن نا سوَب آن اینو وڈھ کیمپس و بلوچستان نا غُٹ جامعہ آک تباہی نا حد ئے سرمسّنہ و استاداک برانز کننگ ئٹی ءُ ولے اوفتا توار ئے کس بنپک ہرانا نیشنل ڈیموکریٹک پارٹی مذمت ئے کیک و ہر گام استاداتون اوار سَلو۔
