امریکی صدر بائیڈن پارینے کہ اسرائیلی وزیراعظم نیتو یاہو سیاسی وڑ ئٹ تینے بچفنگ کن غزہ نا جنگ ئے مرغن کننگ ئٹی ءِ۔
اونا پاننگ اس کہ دا راستو گپ ئسے کہ نیتن یاہو سیاسی وڑ ئٹ تینے بچفنگ کن جنگ ئے مُستی دننگ ئٹی ءِ۔
بائیڈن غزہ ٹی حماس نا جہدکار آتا برخلاف اسرائیل نا گام ہفنگ و فلسطینی تا خلّنگ آ تنقید کرے۔
اسہ ہندنو وخت ئسٹ ہراڑے جنگ ئے ہشت تُو مننگ ئٹی ءِ، اسرائیل آ بھازا ہیتاک بش مننگ ئٹی ءُ، اسہ نیمہ آن بائیڈن و ایلو جہانی مخلوق جنگ ئے چھٹفنگ نا خواست کننگ ئٹی ءِ۔
ایلو کُنڈان اسرائیلی پارلیمنٹ نا اسرائیل پرست آک پارہ کہ دہن مس تو او نیتن یاہو نا مخ تفی ئے کروفس، اونا سرکار ئے چھٹفور، اگہ او غزہ ٹی حماس ئے خَلنگ آن ویتہ جنگ بندی آ امنّا کرے۔
حماس سئے شنبے آ پارینے کہ او دا وخت اسکان ہچو معاہدہ سے آ امنّا کننگ کپک ایسکا کہ اسرائیل مُستی کن جنگ ئے بند کپّک و غزہ آن مچّا فوج ئے کشینگ نا جْوان وڑٹ اقرار کپک۔
نیتن یاہو بھاز وار پارینے کہ اسرائیلی لسکر حماس ئے چھٹفنگ آن ویتہ غزہ آن ہنوف۔
قطر ہم، ہرا امریکہ و مصر تون، قاہرہ ٹی حماس-اسرائیل مذاکرات ئٹی ثالث ءِ، اسرائیل آ زور شاغانے کہ او تینا ارادہ ئے پھاش کے، ہراڑا معاہدہ ٹی غُٹ سرکار امنّا کے۔
