کیچ بلیدہ زامران آن پاکستانی لشکر نا دو آن بیگواہ مروکا تیکن اوفتا خاہوت آتا تولوک برانز تربت ئٹی ڈی سی آفس نا مونا اینو ارٹمیکو دے ہم برجاء سلیس۔
انتظامیہ و سرکاری کارندہ آک داسکان اوفتتون گپ و تْران کتّنُہ۔
تولوک برانز ٹی بلیدہ زامران تون اوار کیچ ئنا ایلو ہند آتیان بیگواہ مروکاتا خاہوت آک ہم بشخ ہلکنُہ۔
تولوک برانز ئٹی بلیدہ آن بیگواہ مسلم عارف نا ایڑ نورجان عارف تْران کرسہ پارے کہ کنا ایلم خدو جون ئنا تُو ئٹی ہفّنگا ہرا داسکان بیگواہ ءِ۔ اگہ او گِڑاس کرینے تو اودے عدالت آ ہتنگِہ نن اسہ دڑد ئسے آن گدرینگ ئٹی اُن۔ مسلم عارف اسہ چُنکو مار اسے و نُہمی جماعت نا خوانندہ سے اودے بیگواہ کننگ قانود نا خلاف ءِ۔ اودے و ایلو بیگواہ تے آجو کننگِہ، او پارے کہ بھاز منت آن پد ہم ننے بِننگ ئٹی افس، نن بیوس مسّن بلیدہ زامران آن تربت اسکا لانگ مارچ کرین کہ ننا توار ئے بِننگہ و ننے انصاف تنّنگِہ۔
حاصل فقیر داد نا ایڑ پارے کہ حاصل فقیر ئے دو ستمبر اِرا ہزار بیست و سئے آ بیگواہ کننگا اگہ او ڈوہ دار ءِ تو اودے عدالت آ ہتنگہ، نن بےقانودی ءُ خْواست ئس کننگ ئٹی افن۔ ولے زور ئٹ بیگواہی ننے خْوار کننگ آن بیدس پین ہِچس اف، ننا بندغاتے آجو کیر و ننتو انصاف کننگہ۔
بلیدہ آن بیگواہ جان محمد نا مسڑ پارے کہ اونا باوہ ئے اِرا ہزار سینزدہ ٹی بلیدہ بٹ نادرا دفتر نا مون آن بیگواہ کریر، او وخت آ کنا عمر اسہ سال ئس اس ولے داسکان کنا باوہ بیگواہ ءِ و کنا سن سینزدہ سال ءِ۔ داسکان باوہ کن خن کسر آ ہُروک اُٹ، تو ننے آن باوہ نا مہر ئے پُھلپس و ننا باوہ ئے آجو کننگہ۔
نوانو زامران آن بیگواہ شہزاد عبید و داؤد عبدالوہاب نا اِلّہ و آل پارٹیز کیچ ئنا جارکش یلان بلوچ پارے کہ شہزاد عبید و داؤد عبدالوہاب اِرا چُنکو مار ءُ ہرافتے دو مئی اِرا ہزار بیست و چھار آ بیگواہ کننگا، دا یام ئٹی نن ضلعی انتظامیہ و ہر اومیت نا در آ ہِنان ولے کس ئس جْوانو ہیت ئس کتو۔ نن بیوس مسّن و داسا برانز آ پیشتمان۔ ننا خْواست ءِ کہ ننا ہخس خاہوت ءُ غُٹ ئے انصاف تننگہ ہرا بندغاک بیگواہ مریرہ اوفتے آجو کننگہ۔ مخلوق ئے بیگواہ کرسٹ ریاست نفرت نا بِج دسنگ ئے بند کے۔ ورنا تے زور ئٹ ہفّنگ قانود تون وفاداری ئس اف، اگہ ورنا ئس گِڑاس کرینے یا اوڑا شک ئس ارے تو اونا باوہ لمہ ئے سہی کننگہ۔ اُرا و فصل آتان مخلوق ئے ہفّنگ دنّنگ جْوانو گام ئس اف۔
آپسر آن فاروق سخی داد نا ایڑ، شے حق کہور خان نا لمہ، ڈاکٹر رفیق نا خاہوت و ایلوفک تولوک برانز ئٹی تران کرسہ پاریر کہ ننا بندغاتے یلہ کننگہ۔ اے وخت اِسکا ننا بندغاک بیگواہ ءُ نن تولوک برانز کرون و برانز ئے زْیات کرون۔
تْران کروکاک سیاسی و چاگڑدی و بندغی حق آتا تنظیم آتیان خْواست کریر کہ او تولوک برانز آ بریر ننا توار ئے بنِر تاکہ ننے انصاف رسینگہ۔
تولوک برانز ئٹی بلیدہ زامران و کیچ ئنا ایلو جاگہ آتیان خاہوت آک اوار مسّنُہ، ہرافک دا وخت آ دہ آن گیشتر ءُ۔ تولوک برانز تون اواری نا درشانی کن ‘حق دو تحریک’ نا ضلعی صدر حاجی ناصر پلیزئی، مولانا نصیر احمد بلوچ، نوید نصیر، بی این پی نا صدیق ساگر، داد جان رند و ایلوفک اوار اسّر۔ بلوچ یکجہتی کمیٹی و بی ایس او پجار ہم برانز نا مخ تفی ئے کرینو۔
