کراچی نا علاقہ ملیر ٹی سید ہاشمی ریفرنس لائبریری نا بھلُنی ٹی مروکا پنی آ بلوچ دانشور و نوشت کار پروفیسر صباء دشتیاری نا 13 میکو سالروچ نا مجلس ٹی بندغی حق آ تا باسک و بلوچ یکجہتی کمیٹی نا راہشون ڈاکٹر ماہ رنگ بلوچ تران کریسہ پارے کہ پروفیسر صباء دشتیاری تینا زند ئے بلوچ راج نا عملی آبیاری کن تس، بلوچ راج تینا راجی ہیرو تے ہچ استان دروف، اَراوختسکان بلوچ زندہ ئے بلوچستان ہست ارے پروفیسر صبا دشتیاری زندہ ءِ۔
اڈ تروکا مجلس ٹی بلوچ ادب نا خوانوکا و ہندیک ہم بھلو کچ ئسیٹی اوار اسُر۔
ڈاکٹر ماہ رنگ پارے کہ پروفیسر صبا دشتیاری کنا استاد اسک، او تینا زند ئے بلوچ راج نا عملی آبیاری کن تس۔ کنے فخر ءِ کہ کنا تعلق ہندون راج ئسے آن ءِ ہرا کہ تینا ہیرو تے ہچ استان دپک۔ او پارے کہ ہراوختسکان بلوچ زندہ ءِ بلوچستان ارے پروفیسر صبا دشتیاری زندہ مرو۔
مجلس ٹی بلوچی بولی نا نوشت کار اے آر داد، شاعر و نغد کار اسحاق خاموش، پروفیسر رمضان بامری، غلام رسول بلوچ، سید ہاشمی ریفرنس لائبریری ملیر نا بھلا اکبر ولی و پین مقررین تران کریسہ پاریر کہ پروفیسر صبا دشتیاری ادب و لسانیات نا مضمون تیٹی گشاد و لائخی تخاکہ۔ او پارے ک بلوچی بولی و ادب نا خذمت ئے کرینے۔ پروفیسر صبا دشتیاری اَسہ کمیٹیڈ بندغ ئس اسکہ او تیوہ زند بلوچ راج و بلوچی بولی نا خذمت کرینے۔
او پاریر کہ صبا دشتیاری جتاء سرحال تیا 12 آن زیات کتاب نوشت کرینے، لسانیات نا مضمون آ تیٹی اونا نوشت کروکا کتاب آک بھاز اہم ءُ۔
او پاریر کہ پروفیسر صبا دشتیاری نہ بیرا کتاب آ تا نوشت کار ئس اسک بلکن او ورنا تے خواننگ نا نیمہ آ ہتنگ کن ہم اونا اہم کڑد ئس مسنے۔
او پین پاریر کہ بلوچ ئے چاننگ کن اونا نفسیات ئے پُہہ مننگ مرو، بلوچ سخت انگا حالیت آ تیٹی رہینگ نا ہنر ءِ چائیک۔ دا ملک نا ہفتاد و پنچ سال آ دیہاڑ ٹی بلوچ ئے پُہہ مننگ نا کوشست کننگتو، پروفیسر صبا دشتیاری بلوچ نا بابت ئٹ دا بے پُہی نا برخلاف جہد کرے۔
