بلوچستان نا ہند ضلع چاغی ٹی سیندک پروجیکٹ ٹی بے ہندی بندغ آتے بھرتی کننگ نا برخلاف پریس کانفرنس کننگ آ ورنا و اوفتا خاؤت آ تے جتاء زرائع ئٹ دڑکو تننگ ءُ۔
دا بارو ئٹ چاغی نا ہندیک پریس ریلیز ئٹی پاریر کہ ریکورڈک و سیندک پروجیکٹ ئٹی بے ہندی بندغ آتے بھرتی کننگ نا برخلاف پریس کانفرنس کننگ نا سوب آن ورنا تے و اوفتا خاوت آتے دڑکو رسینگ ئٹی ءِ۔
اوفتا پاننگ ءِ کہ قانود نافذ کروکا ادارہ آک نوٹس ہلنگ نا جاگہ غا ہیت کروکا تے انڈین ایجنٹ، شونداری نا مخالف و غدار پاننگ ءُ۔
درشان ئٹی پاننگانے کہ نن دا ہیت ئے ہڑدے نا وڑ صاف پانہ کہ سرزمین نا رکھ ئنا کسر ئٹی دا دڑکو تیٹ ننے چپ کرفنگ کروفس، گڈیکو دم ئسکان ساحل و وسائل آتا لُٹ و پُل نا مخالفت ئے کرون۔
اوفتا پاننگ اس کہ بلوچستان ئٹی بارڈر، زراعت و سروس سیکٹر آن پد داسہ ننے زمین آن بے دخل کننگ ءُ و ہرا قانودی حق ءِ اودان ہم پد بٹنک ءُ۔
او پاریر کہ تیوہ بلوچستان ئٹی سیوتی تے مُچ کرِسہ لُٹ کروکا تا برخلاف تحریک ئے منظم کرون۔ اگہ تینا وسائل آ تیان و قانودی حق آ تیان ننے پد بٹنگا تو ریکورڈک و سیندک آن لُٹ و پُل کروکا خل و ایلو مڈی تے پیشن دننگ نا کسر ئے بند کرون۔
