شال : بیگواہ آ بلوچ آتا توار ( وی بی ایم پی ) نا سر کماش نصر اللہ بلوچ پارے کہ زوراکی ئٹ بیگواہ مروکا محمد حیات و شاہ فیصل نا خاہوت اوفتا کیس آتے وی بی ایم پی نا راہا یات داشت کرے۔ اوفک تنظیم ئے پاریر کہ محمد حیات مینگل ولد شاہ نزرئے پاکستانی لشکر ہندا سال 22 مئی آ پڑنگ آباد مستونگ آن غیر قانونی وڑ ئٹ دزگیر کننگ آن پد بیگواہ کری۔ شاہ فیصل ولد جان محمدئے 5 فروری 2022 آ نوشکی بازار آن دزگیر کرینے ۔ خاہوت ئے اونا بابت ئٹ ہچ سرپدی تننگ متنے۔ ہندا سوب آن اوفک پریشانءُ ۔ تنظیم اوفتے دلجمی تسونے کہ محمد حیات و شاہ فیصل نا کیس ئے کمیشن و سرکارئے تننگ تون اوار اوفتا آجوئی کن ہر جاگہ آ توار بُڑز کننگ مرو ۔
نصراللہ بلوچ پارے کہ دا سال آ زوراکی ئٹ بیگواہی تیٹی تُروندی بسونے۔ زوراکی ئٹ بیگواہ آ بندغ آتا دروغ ئنا میڑ تیٹی خلنگ اوفتا جُشوک جون تہ دُو تمنگ نا ویل آتے وی بی ایم پی ئے تننگ مریرہ دا سخت دڑدی ءُ ہیت ئسے نن دادے شیف خلینہ و خواست کینہ کہ زوراکی ئٹ بیگواہ آ بندغ آتے آجو کننگ نا دلجمی تِس مرے زوراکی ئٹ بیگواہ آ بندغ آتے دروغ ئنا میڑ تیٹ خلنگ بند مرے،اوفتا جُشوک تہ جون تہ دو تمنگ بند مرے،دا غیر قانونی، بے راہبند آ گام و دڑدی آ ویل آتیٹی اوار انگا بندغ آک سوج کننگ مریر۔
