بلوچستان آن بندغی حق آتیک کاریم کروک و بلوچ بیگواہ تا توار مننگ کن سمی دین بلوچ ئے انعام تننگا۔
ڈبلن، آئرلینڈ ئٹی اڈ تروکا دیوان ئٹی سمی دین بلوچ ایشیا و بحرالکاہل خطہ کن ‘فرنٹ لائن ڈیفینڈرز ایوارڈ 2024’ ئے دُوئی کرے۔
سمی دین بلوچ ئے بلوچستان ٹی انصاف و بندغی حق آتیک بھادری و سوگوی ئٹ کاریم کننگ کن انعام تننگا۔
دیوان ئٹی سمی دین بلوچ پارے کہ کنا باوہ (ڈاکٹر دین محمد بلوچ) نی چائِہ ہراڑیک اُس ای نے پاننگ خْواہیوہ کہ ہِنوکا پانزدہ سال ئٹی ای نا آجوئی کن بھاز کوشست کریٹ، وختس ہم تینے آرام کِہ الّیتوٹ۔ نا بیگواہی نا دڑد کنے غُٹ بیگواہ تا و اوفتا خاہوت آتا توار جوڑ مننگ آ مجبور کرینے۔ ای بھازا وخت انصاف و اومیت کن جہد کرینُٹ۔
او پارے کہ ای سوگوؤ جوزہ تخوہ ہمو وخت اسکان جہد کروٹ ہرا وخت اسکا گُڈیکو بیگواہ آ بندغ ئے آجو کننگپک۔ ای دا انعام ئے بلوچستان نا بھادرا مخلوق نا پِن آ کیوہ ہرافتا ہر وڑ ئنا ظلم و بندغی حق آتا پامالی نا مون آ سوگوا حوصلہ آک کنے ہڑدے کمک کریر۔
یات مرے سمی دین بلوچ ہنوکا پانزدہ سال آن تینا باوہ ڈاکٹر دین محمد بلوچ نا آجوئی کن توار ہفنگ ئٹی اے ہرادے اِرا ہزار نُہہ ئٹی پاکستانی فوج و اونا کارندہ آک زور ئٹ بیگواہ کریر۔
دا یام ئٹ سمی دین بلوچ زور ئٹ بیگواہی تا برخلاف تحریک نا بھلُنی ئے ہم کننگ ئٹی اے۔
او ‘وائس فار بلوچ مسنگ پرسنز’ نا شال آن کراچی و اسلام آباد ‘لانگ مارچ’ تون اوار خَدو نا سال زور ئٹ بیگواہی و بیگواہ تے خلّنگ بٹِنگ نا برخلاف شال آن اسلام آباد اسکان ہم ‘لانگ مارچ’ ئٹی بشخ ہلک۔
